Кундемыштына начар уш-акылан спортсмен-влакын мини-футбол (футзал) дене «Футбол в коррекционной школе» Всероссийский таҥасымашышт эртаралтын.
Тушто 10-13 ияш 12 ӱдыр да 20 рвезе команде вийыштым тергеныт. Марий Элын ӱдыр-влак командыже ты турнирыште ший призёр лийын.
Ончыко каят
2021 ий годсек Марий Элысе начар уш-акылан-влакын (ЛИН) спортышт федерацийым Леонид Николаевич Решетов вуйлата. А ты сомылым шукташ тӱҥалмыж деч ик ий ончыч тудо Республикысе спортивно-адаптивный школыш мини-футбол (футзал) дене тренер-преподавательлан пашам ышташ толын. Кызыт Леонид Николаевич республикыштына начар уш-акылан-влакын спортыштын куд тӱрлӧ йыжыҥжым вияҥдымылан вуйын шога: мини-футбол, иймаш, куштылго атлетике, дзюдо, бадминтон, ӱстембал теннис.
– Ӱдыр-влак командым 2024 ийыште тренироватлаш тӱҥалынам. Ты ийынак мини-футбол дене начар уш-акылан спортсмен-влаклан «Футбол в коррекционной школе» проект илышыш шыҥдаралтын. Икымше кугу таҥасымаш Санкт-Петербург олаште эртаралтын. Тушто Марий Элысе 1-ше ден 2-шо коррекционный школ-влак гыч чумырымо сборный команде кумшо верым налын ыле.
2024 ийыштак республикыштына Российысе начар уш-акылан-влакын спортышт федерацийын отчётно-выборочный конференцийже лийын, тушто мыйым ты федерацийын ик еҥжылан ойыреныт да мини-футбол (футзал) дене Российысе сборный командын тренержылан палемденыт.
Мини-футбол дене республикнан сборный командыже-влак чӱчкыдын тӱрлӧ таҥасымашышке лектын коштыт да сай лектыш дене куандарат. Ӱмаште, «Футбол в коррекционной школе» таҥасымаш Озаҥ олаште лийын. Тушто республикысе 1-ше ден 2-шо коррекционный школ-влак гыч чумырымо ӱдыр-шамычын сборный командышт икымше верым налын. Садлан йӱла почеш тенийысе турнир сеҥыше командын регионыштыжо – Марий кундемыште – эртаралтын. Тушко элнан коло утла регионжо гыч кумшӱдӧ наре участник толын. Ӱдыр-шамыч ты таҥасымашыште шке мастарлыкыштым эше ик гана пеҥгыдемденыт да кокымшо лийыныт. Рвезе-влаклан пиал шыргыжалын огыл. Но таҥасымаш кугу кӱкшытыштӧ эртымым шукын палемденыт, ятыр еҥ деч тау мутым колынна, – каласкала Леонид Николаевич.
Сеҥымаш ятыр
Марий Элысе футбол (футзал) дене шуаралтше начар уш-акылан спортсмен-шамычын кугу кӱкшытан моло таҥасымашлаштат сай лектышыштым палемдаш лиеш. Мутлан, 2022 ийыште республикысе Спортивно-адаптивный школын мини-футбол дене рвезе-влак команде Российысе икымше кубокын озаже лийын. А 2025 ийыште Мордовий Республикысе Саранск олаште Российын чемпионатше ден первенствыштыже ты школын пӧръеҥ да рвезе-влак командышт кумшо верым налыныт. Ты ийынак тӱнямбал чемпионатыште Российын сборный командыже (тушто Марий Элысе спортсмен-влакат улыт) кокымшо вер дене палемдалтын. Тений мини-футбол (футзал) дене Российын икымше первенствыштыже ӱдыр-влак команде чемпион лӱмым сулен.
Л.Решетов деч тренер лияш мо кумылаҥден, молан лач футзалым ойырен, йоча-шамыч дене пашам ышташ кузерак, умылкалышым. Вашмут тыгерак йоҥгыш:
– Йоча-влакым да футболым йӧратем. Ачамат, изамат, мыят футбол дене модынна. Икшыве-влак коклаште мини-футболын (футзалын) ончыкылыкшым шижынам да ужынам, садлан тудым вияҥдаш кумылаҥынам.
Тренерлан эн ончыч чытыше лийман. Вет йоча-шамыч тӱрлӧ улыт, сандене сай лектышыш шуаш манын, нунын дене кылым муын моштыман. Кокымшо – пашаче кумыл. Пашаштем икымше тренерем Владимир Сергеевич Ненашкинын опытшылан чӱчкыдын эҥертем. Тыгак онлайн-урок, семинар ден сессийлашке ушнаш тыршем. У йӧн, у шинчымаш паша процессым чын чоҥымаште сайынак полшат.
Тренерын пашажым туныктышо, врач, утарыше-влак дене ик радамыш шынден кертам. Вет ме обществылан ончыкылык патриотым, чын айдемым куштена. Садлан тренер шке воспитанникше-шамычлан эн ончыч эталон лийшаш, нуным шке икшывыже-влак семынак йӧратышаш да ончыко вӱдышаш.
Леонид Решетовын чын да пагалыме тренер улмыжым воспитанникше-шамычын лектышышт пеҥгыдемдат. Тачысе кечылан тренер 10 Российын спорт мастержым, 8 спорт мастерыш кандидатым куштен. А талантан да уста-влакше мынярын улыт? Нунын эше чылажат ончылно, ойла тудо.