5 майыште Юл кундем федеральный округысо законодательный погынласе ӱдырамаш-депутат-шамычын ушемыштын заседанийышт видеоконференций йӧн дене эртаралтын.
Тудо кугыжаныш социальный политикын ик эн кӱлешан пашаж семын палдырныше темылан, Ачамландым аралыше-влакын ешыштлан полшымашлан, пӧлеклалтын.
Марий Эл гыч ты заседанийыште Кугыжаныш Погын Президиумын еҥже, Социальный политике, тазалык аралтыш да ветеран-влак паша шотышто комитетын председательже Наталья Козлова, паша да социальный аралтыш министрын алмаштышыже Вера Пронина, тыгак Йошкар-Ола округысо депутат-влак погынымашын депутатше, «Защитники Отечества» фондын филиалжын социальный координаторжо Евгения Глушкова лийыныт. Тыгак каҥашымашке Марий Эл Кугыжаныш Погын Председательын алмаштышыже, «Герои Марий Эл. Талешке-влак» кадровый программын участникше Александр Смирнов ушнен.
Кугыжаныш Думын депутатше Татьяна Ларионован палемдымыж почеш, Кугыжаныш Думо СВО участник-влаклан, нунын ешыштлан полшышо 164 федеральный законым луктын, да кызытат паша ышталтеш.
Эн йодмашан темлымаш-влак коклаште улыт: военнослужащийлан да тудын лишыл кок еҥжылан военно-врачебный комиссийыш оксам тӱлыде каяш да мӧҥгешла толаш; вуйым пыштыше салтакын ешыжлан, тыгак 18 ияш деч кугурак инвалид йочам ончен куштышо военнослужащийлан илыме вер дене полшымо шотышто регион-влаклан полномочийым пуаш.
Т.Ларионова пӧртылшӧ боец-влаклан льгото да психологий полыш шотышто кумдан палдараш кӱлеш манын, посна медиатор-влакым ямдылыме денат (Озаҥысе федеральный университетын тыгай опытшо уло).
Заседанийыште тачысе кечылан келшен толшо социальный полыш шотышто каҥашыме да Татарстанысе, Башкортостанысе, Мордовийысе, Пенза ден Угарман кундемласе мере-влак нерген доклад-шамычым колыштмо. Тушто именной батальонлан ешартыш выплатым пуымо, санаторийыште черет деч посна эмлалтме, йочасадлан тӱлымаш деч кораҥдыме, военный социальный контрактым ыштыме, СВО ветеран-шамычлан полшымо посна ведомствым ыштыме, льготан займым пуымо, тунеммылан оксам пӧртылтымӧ нерген ойленыт.
Регионлаште инвалидностян ветеран-влаклан социальный реабилитаций ден адаптивный спортым вияҥдат, военный журналист-шамычлан, йомшо салтак-влкын шоҥго ача-аваштлан да ешыштлан полшат. Ты категорийлан паша верлаште квото лийме нерген законын кӱлешлыкше йодышым тарватеныт.
Чыла полышым иктешлен, участник-влаклан колтат. Наталья Козлован палемдымыж почеш, заседанийысе теме-влак чот шерге улыт, нуным шке пашаште сай опыт семын кучылташ тӱҥалыт.
Кугыжаныш Погынын фотожо.