31 августышто Ветеринарын кечыже палемдалтеш. Ты кечын вольыкым да янлык-влакым эмлыше да нунын тазалыкышт верч тыршыше чыла гаяк специалист-шамычым саламлат. Анастасия Сильдуганова – янлыкым эмлыше опытан специалист. Тудын паша стажше 13 ийыш шуэш.
Изинекак янлык-влак коклаште
Йошкар-Олаште шочын-кушшо ӱдыр Ежово селаште верланыше Марий аграрный колледжыште кыдалаш профессионал шинчымашым налын. Кокымшо курсышто тунеммыж годымак врачын ассистентшылан стажироватлалташ тӱҥалын, тыге – кум ий. Профессионал мастарлыкшым Угарманысе кугыжаныш агротехнологический университетыште нӧлтен. Ты жапыштак общий практикын специалистше семын янлык-шамычым эмлаш тӱҥалын.
– Мемнан суртыштына эреак шуко янлык лийын. Пачерыште илымына годым ик пӧлемыште ачам тичмашнек ятыр попугайым ончен.
Шке пӧртыш илаш куснымеке, эшеат шуко да тӱрлӧ янлыкым ашнаш нимогай чарак лийын огыл. Ачам нуным моткоч йӧратен. Изи йоча гай суртышкына урем гыч ятыр пырысигым нумалын. Варажым пырыс, пий, тӱрлӧ нултышо янлык, чыве, сӧсна, кролик, каза илаш тӱҥалыныт. Садлан ончыкыжым кӧ лияш манын, утыжым шонкалаш пернен огыл. Вет нуным ала-кӧлан эмлаш кӱлын. Кугурак акам тунам ик клиникыште ветеринарлан тыршен. Очыни, тудымат ончен, ончыкылык профессийым ойырен налаш кумылаҥынам.
Ты пашаште ик стандарт почеш ыштыман огыл, тӱҥжӧ – лывырге уш-акылым кучыман. Вет тыланет шкешотан «следопыт» лийман. Янлык-шамыч мутланен огыт мошто, садлан специалистлан чот ушан лийман, – каласкала ӱдыр.
Утарет – куанет
Янлык-шамычлан полшымо годым врач шкешотан йывыртымашым шижмыж нерген палдарыш. Тудо ойла:
– Кажне янлыкын илышыжым утарен кодаш полшымаш – кугу куан. Мемнан деке тӱрлӧ ситуаций дене толыт, но шукыж годым сай лектыш дене нуным ужатена.
Мутат уке, чыла тидыже икмыняр ий дене шинчымашым нӧлтымашын, стажировкым, курсым, переквалификацийым эртымашын надырже. Кызытсе илышыште янлыкым да вольыкым эмлымашат ятырлан ончыко тошкалын. Садлан врач семын кушкашат, уш-акылым пойдарашат йӧн уло.
Шарнем, врачлан пашам ышташ тӱҥалынам веле ыле, приёмыш кум тылзашрак пасушто мумо пинегым конденыт. Тудын могыржо мучко чот шуко тий лийын. Тунам уждымем ужмемла чучын. Клиникыште кӱлеш оборудований улмылан кӧра пинегылан вашке диагнозым шынденна да эмлаш тӱҥалынна. Тыге тудым паразит-шамыч деч утаренна. Такшым янлык ден вольыкымат тӱрлӧ чер витара, садлан тынар ий пашам ыштыме годым шуко мом ужаш логалын.
Врачын ойлымыж почеш, нунын деке шукыж годым пагар-шолора да коваште чер, тӱрлӧ вирусан инфекций дене полышым йодын толыт.
Суапле профессий
Мутланен кертдыме пациент-влакым эмлаш, чынжымак, ойыртемалтше профессий. Садлан специалист-шамыч шке коклаштышт профессийыштым суапле паша, маныт.
Анастасия Сильдуганова ты аланыште ятыр ий тырша. Опытан врач семын посна специализаций-влакым вӱда: дерматологийым, эндрокинологийым, клинический да патологический цитологийым. Тудо шуко янлыкын онкологий чер дене черланымыштым палемда. Тыгак верге да мочеполовой системе дене кылдалтше чер- шуко палдырна, манеш.
– Эндокринологий могырым, мутлан, пырыс-шамыч сакыр диабет дене орланат. Отит, атопий, кочкышлан аллергий, тӱрлӧ паразит дерматологий могырым черлан вияҥаш йӧным ыштат.
Кундемыштына орымаш чер деч вакцине обязательныйлан шотлалтеш. Тыгак пийлан тӱрлӧ вирусан чер (аденовироз, парагрипп, чума, гепатит, лептоспироз) деч прививке ышталтеш, – ойла врач.
Тыге чучеш: ветеринар-шамыч пушкыдо кумылан ныл йолташна-влакын суксышт улыт. Нуно мут деч посна уш-акылышт, порылыкышт, профессионал мастарлыкышт, шинчаончалтышышт дене кеч-могай черым чактарен сеҥат.