Шернур район Эшполдино ялыште илыше Людмила Алгаева Ямбаршева ӱдыр фамилийже нерген тыгерак воза:
– Ямбаршев фамилий – шуэн вашлиялтше. Тудо XVIII курым кыдалнак шочын. Тиде фамилий башкир, татар да марий-влак коклаште вашлиялтеш. Тюрк йылме гыч кусараш гын «ямбар» мут лопка чуриян еҥым ончыкта. Но кызыт мартеат чын значенийжым иктат каласен ок керт. Пале: тиде фамилийым нумалше икымше еҥ Юмо деке лишке лийын.
Ямбаршев фамилийым нумалше еҥ-влакым тӱрлӧ эҥгек ӧрдыж гыч эртен кая, илышышт пиалан, маныт.
Авам могырым кочам Дмитрий Иванович Ямбаршев 1902 ийыште Кандрач почиҥгаште шочын. Тысе ялыште илыше-влак чылан Ямбаршев фамилийым нумалыныт. Сар тӱҥалмеке, кочамымат наҥгаеныт, карел-финн фронтыш логалын. Кум тылзе гыч финн-влак тудым пленыш налыныт. Тушто ик ий наре лиймеке, начарын кочмылан кӧра 1942 ийыште концлагерьыште колен. Кийыме верыштыже финн мландыште кызыт пу ырес шога. Кочам дене уло родо-тукымна кугешнен ила. Тудын ныл икшывыже кодын, авамат Анна Дмитриевна ныл йочам йол ӱмбак шогалтен.
Л.Алгаеван альбомжо гыч налме фото.