Йошкар-Олаште III Республиканский муниципальный форум лийын, тудо ял старосто-шамычым, ТОС (территориальный общественный самоуправлений), калык дружине-влакын еҥыштым да яллаште илыше чолга еҥ-шамычым ушен. Тушто верысе самоуправленийым вияҥдыме, ялыште илышым кузе пырля саемдаш лийме нерген каҥашеныт.
Форумыш Кугыжаныш Погынын Президиумжын членже, Социальный политике, тазалыкым аралыме да ветеран-влакын пашашт шотышто комитетын председательже Наталья Козлова ушнен.
Депутат палемден: старосто ден ТОС-влакын ялым арален кодымаште да вияҥдымаште рольышт кугу. Марий Элын Кугыжаныш Погынжын Председательже Михаил Васютин лӱмжӧ дене погынышо-влаклан мер пашам шуктымыштлан, еҥ-влак дене пайдалын пашам ышташ йӧным кычалмыштлан тауштен.
«Иктат вигак старосто але ТОС председатель шочын огыл, нигуштат тидлан тендам туныктен огытыл. Те ял калык, пошкудыда-влак дене кылым ыштеда, шке кундемлан ешартыш средствам кычалыда, ялысе кажне еҥ шке мландыштыже оза улмыжым шижше манын тыршеда», – каласен Наталья Козлова.
Вара ятыр ий да тыршен пашам ыштымылан, верысе да общественный самоуправленийым вияҥдымашке кугу надырым пыштымылан икмыняр еҥым награде дене палемден:
- ТОС общероссийский ассамблейын почётан грамотшо дене – Морко район Эҥерсола ялын старостыжо Татьяна Гавриловам,
- ТОС общероссийский ассамблейын таумутшо дене – Медведево районысо «Руш Кумарий Актуганово урем» ТОС-ын председательже Дмитрий Васиновым, Советский район Кугунур ялын старостыжо Сергей Григорьевым, Параньга район Штрамарий ялын старостыжо Андрей Ильиным, Кужэҥер район Марий Шой ялын старостыжо Нина Лебедевам, Волжский округ Кичиер посёлкын старостыжо Николай Николаевым.
