Шукерте огыл Йошкар-Оласе «Единый Россий» партийын общественный поддержке штабыштыже «Земский почтальон» Всероссийский конкурсын регионысо этапшым иктешлыме.
Конкурсыш ушнаш 70 йодмаш пурен. Лач 22 почтальон финалыш лектын. Кажныже «Единый Россий» партийын калык программышкыже да «Российское село» проектышкыже надырым пыштымылан таумут дене палемдалтын. Сеҥыше-влак радамыште – Волжский район Сотнур почтын почтальонкыжо Татьяна Алексеевна Филиппова. Марий ӱдырамаш кокымшо верым налын.
– Почтыштына ныл почтальон улына. Мый визымше участкылан вуйын шогем. Сотнур селасе ныл изирак уремым, Руш Шайра, Шайрамбал, Полатсола, Курыклӱвал Шайра яллам обслуживатлем.
Почтышто 2023 ий годсек ыштем. Тылеч ончыч ургызо пашам шуктенам, ик палыме маркетплейсын складыштыже тыршенам. Ик татыште илышыштем чыла сӱмырлен. Руслан эргым СВО-што вуйым пуштен. Тудо 19 ияш веле лийын. Илаш да илаш…Чот ойгыренам. Кок тылзе мӧҥгыштӧ шинченам, нигушкат лектын коштын омыл. Эргым колымо дене мый шкежат пуйто пычкемыш тӱняшке логалынам.
Икана Сотнур почто отделенийын начальникше Лидия Ивановна Иванова мом мӧҥгыштӧ ойганен киет, лек мемнан деке пашаш, коллективна икоян манын, почтыш пашаш ӱжын. Чон сусыр нигунам ок тӧрлане. Но паша дене, еҥ-влак дене вашлийын кутырен, южышт дене чон почын мутланен, ончыко каяш вийым муынам. Адакшым мый шуко шочшан ава улам. Ик икшывем – студент, кокытшо эше школыш коштыт, – ойла Татьяна Филиппова.
Почтальонко пашажым йӧратен ышта. Сотнур кундемыште еҥ-влак газетым шукын лудыт. «Волжские вести», «Волжская правда», «Кугарня», «Марий Эл», «Сурт-пече», «Ямде лий» газет-влаклан подпискым ыштат, «Кече» да моло журналым налыт. Татьяна Алексеевна йӱр ма, лум але тӱтан – корреспонденцийым, тӱрлӧ сатум жапыштыже намиен шукташ тырша. Пашадарлан огыл (а почтальонын тудо моткоч изи), а чон йодмо почеш.