Кызыт чылан манме гаяк тӱрлӧ соцсетьыште шинчена да келшыше блогер-влакым ончена. Мылам Одо кундем гыч блогер Алиса Мелехина келша. Тудо ялысе илышым ончыкта. Адакшым Алисан аваже марий ӱдырамаш. Блогер шкежат марла моткоч мастарын куштен мошта. Тидлан тудым аваже Сильва Коробейникова туныктен (С.Коробейникова нерген статьям 8-ше майыште лекше номерыштына лудаш лиеш).
А.Мелехина дене лишкырак палыме лияш шонен, ик соцсетьыште тудлан возенам. Чапланыше блогер, ныл шочшан ава интервьюлан уло кумылын келшен. Мутланымаш гыч самырык ӱдырамашын проста койыш-шоктышан улмыжым шижым.
Ола гыч ялыш
– Алиса, Марий Элысе яллаште шуко самырык еҥ олаш илаш куснаш тырша. Тидыжым олаште сай пашам муаш, сайынрак илаш йӧн шукырак уло манын умылтарат. Тендан ешдам ялысе илыш мо дене сымыстарен?
– Ял гыч олаш илаш куснымо сӱрет чыла кундемыштат палдырна. Мый ик удмурт ялыште кушкынам. 18 ийым темымеке, пошкудо изи олаш илаш кусненам. Марлан лектынам. Пелашем дене шым ий ончыч сӱаным ыштенна. Пачерыште иленна. Но чон эре ялыш шупшын. Ковид тӱҥалме дене ныл пырдыж коклаште шинчен шер темын. Дачына лиеш гын, могай пиал манын шоненна.
Да 2021 ийыште Глазов районысо Пышкец ялыште пӧртым налынна. Ялыште чонлан ласка. Кызытсе саманыште мӧҥгӧ гыч лекде пашам ышташ йӧн уло, интернет веле лийже. Интернетым ме тидын шотышто кучылтын моштена. Кӧ йот Бали отрошто ила да пашам ышта, а ме ялым ойыренна. Адакшым тудо Глазов ола деч 20 меҥге тораште веле верланен. Тушко кеч-могай жапыште каен, канен кертына. Икшывына-влакымат оласе йочасадыш коштыктена.
– Удмурт урлык шорыкым ашнеда. Моло урлык дене таҥастарымаште тудо мо дене ойыртемалтеш?
– 2022 ийыште тыгай шорык-влакым ончаш тӱҥалынна. Пелашем – зоотехник. Тудо тидын шотышто шукырак ойлен мошта. Чыла вольык кокла гыч, мемнан шонымаште, шорыкым ашнаш куштылгырак. Кызыт яллаште шуко фермер тӱрлӧ йот урлык вольыкым ашна. Удмурт шорыкым 1950-ше ийлаште луктыныт. Тудо шылан да межан урлыклан шотлалтеш. Межше пушкыдо, ошо. Тудым куанен йӧрат. Ты меж гыч пидме носки, пижерге шокшо улыт, коваштыште аллергийым огыт лук.
Тыгай шорыкым ашнаш посна йӧным ыштыман огыл. Телым 37 градус йӱштӧ годымат шорыкна таза пачам ыштен. Икманаш, Одо кундемысе климатлан келшыше урлык. Кызыт 50 утла шорыкна уло.
– Пашаче еҥ нерген эр кынелше оксам муэш манын ойлат. А ялыште, поснак кугу озанлык улмо годым, эшеат эр кынелман. Кузе тидлан тунемын шуында?
– Шкемым ончыч тумналан шотленам. Йоча-влак шочмеке, кузе эрдене кынелаш тӱҥалам манын ойгыренам. Айдеме чылалан тунемеш улмаш. Эрдене кынелын, тынар шуко пашам ыштен шукташ лиеш. Ончыч пелашем дене йога дене заниматленна, эрдене тӱнӧ канен коштынна, йӱштӧ вӱд дене чывылалтынна. Вара шорык кӱтӱнам эскерен, кофем йӱынна. Тунам чонлан тунар чот сай!
Такшым пелашем мый дечем ондакрак кынелеш. Тӱрлӧ пӧръеҥ сомылым ышта. Мый утларакшым йоча-влакым ончем. Коктынжо йочасадыш коштыт гын, кок йыгыр ӱдырна эше изи улыт.
– Тендан блогдам ончен, ялысе романтикым веле ужам, шуко еҥым ялысе илышым йӧраташ таратеда. Но вет нелылыкшат уло…
– Тиддеч посна нигузе. Илышнам ик блокышто ончыкташ, конешне, огеш лий. Подписчикем-влак дене сай, куанле татна-влак дене веле пайлалтме шуэш. Озанлык, пӧрт, илыш-йӱла, йоча-влак – чылажат вийым йодеш. Ала-момат ыштыме, чыла вере шуктымо шуэш. Мутлан, пакчам шындынена, но умылена, тений тидым ышташ йӧнна уке. Илышыште тӱрлыжат лиеда, чӱчкыдын шке «хотелкымат» ӧрдыжеш кодаш логалеш, ялыште илен, приоритетым чын шындаш тунемынна.
– А мо Тендам интернет-контентым, блогым ышташ таратен?
– Йолташем-влак ик соцсетьыште регистрироватлалташ кумылаҥденыт. Вара мый ала-могай сторис марафоныш логалынам. Тушко 500 еҥ ушнен ыле. Мый тушто сеҥенам, да тидыже блогым вияҥдаш шӱмаҥден. Ынде шым ий ты пашам шуктем. Подписчикем-влак пост йымаке комментарийым кодат, тидат мыйым кумылаҥда.
Алиса блогыштыжо ялысе илышым мыскара гоч ончыкта. Пеш оҥай. Вес кундемыште канымыж денат палдара. Путешествоватлаш марий-удмурт блогер эре йӧратен. Чылаже 17 элыште лийын. Эсогыл сӱанжат путешествий да калык-влак тематикан лийын. Уна-влак тӱрлӧ калыкын костюмжым чиен миеныт ыле.