Параньга район Олор ялыште шочын-кушшо Татьяна Сенькина Руш Лажмарий ялысе ФАП-ште тырша.
Татьяна тушко «Земский фельдшер» программе почеш медшӱжарлан пашаш толын. 2023 ий годсек ФАП-м вуйлата.
– Олор кыдалаш школышто индешымше класс деч вара Йошкар-Оласе медколледжыш «сестринское дело» отделенийыш тунемаш пуренам. 2021 ийыште дипломым налмеке, ик жап Йошкар-Оласе Вашкеполыш станцийыште диспетчерлан пашам ыштенам. Вара «Земский фельдшер» программыш ушненам да Руш Лажмарийыш толынам. Тыште мылам пачерым пуэныт. Туштак илем, – ойла самырык специалист.
Т.Сенькина изинек шкенжым лач медицине аланыште ужын. Пашаже чонжылан келша. Калык дене пашам ышташ кызыт нелырак лийын манеш, туге гынат Татьяна еҥ-влак дене ик ойыш шуаш, чыла сайын умылтараш тырша.
ФАП Руш Лажмарий, Лажмарий, Штрамарий, Скревын, Юлкыш яллаште илыше 350 кугыеҥ ден 90 йочам обслуживатла. Еҥ-влак тӱрлӧ нелылык дене толыт. Утларакшым нуным кугу але изи давлений, остеохондроз витара.
– Кечеш 10-20 еҥ полышым йодын толеш. ФАП-ште мый шкет специалист улам, тыгак уборщице тырша. Кардиограф, ростомер, виса улыт. Тылзылан кок гана районысо эмлымвер гыч терапевт толеш, – палдарыш медшӱжар.
Т.Сенькина – арулыкым йӧратыше специалист. Ӱстелтӧрыштыжӧ чыла кагаз шот дене кийышаш. ФАП кумдыкышто сӧраллыкым шке ышта, тӱрлӧ пеледышым кушта. Ӱмаште «Территория образцового содержания ФАП» республикысе конкурсышто икымше верым налын.