«Защитники Отечества» кугыжаныш фонд спецоперацийын ветеранже-шамычлан да нунын ешыштлан агропромышленный комплексым вияҥдаш полшышо эн йодмашан йыжыҥлаж почеш шинчымашыштым нӧлташ полша. Кумылан-влаклан «Фермерын школжо» программе почеш тунемаш йӧн уло. Тудын почеш шинчымашым налше-влак Российысе Ялозанлык министерстве деч грант полышлан эҥертен кертыт.
Тыгай йӧн дене пайдаланен, Марий Эым Вуйлатыше Юрий Зайцев «Пеледыш айо» пайрем годым «Агромотиватор» программе почеш шке пашам вораҥдараш Килемар округ гыч Алексей Астафьевлан да Курыкмарий кундем гыч Андрей Львовлан грантым кучыктен.
«Фермерын школжо» программе почеш тунемаш шонышо ветеран-шамыч дене Марий Элысе ялозанлык министр Павел Раевский ден «Защитники Отечества» фондын Марий Элысе филиалжым вуйлатыше Ренат Магсумов вашлийыныт. Нуно ты школын тӱҥ шонымашыже да задачыже-влак нерген палдареныт. Тунеммашын теоретический ужашыже дистанционно эрта, тудлан 150 шагат ойыралтеш. Практикылан – 100 шагат. Нуным аграрно-промышленный комплексыште организоватлат. Тунем лекмеке, салтакын Российсе Ялозанлык министерстве деч ешартыш грант полышым налаш йӧнжӧ лиеш. «Агромотиватор» грант почеш шыл але шӧр-торык сатум ыштен налаш тӱкан шолдыра вольыкым ашныме сомылым вораҥдарымылан 7 миллион теҥгем, вес йыжыҥлан 5 миллион наре теҥгем пуат.
Республикыштына сентябрь мучаште «Фермерын школжо» почеш тунемаш тӱҥалыт. Тудо декабрь мучаш марте шуйна. Тылеч вара кажне тунемшым диплом дене палемдат.
Тачысе кечылан кундемнан ныл ветеранже фермер озанлыкым вияҥдыме шотышто соцконтрактым пеҥгыдемден да пашам шукта.