Кундемыштына «Марий йомак-влак» кинолабораторийын проектше-шамыч вийым налыт. Нуным илышыш пуртымаште ятыр профессионал-влак тыршат. Ик тыгай еҥ-влак радамыште – Юлия Шадрина. Тудо продюсерын сомылжым виктара.
Шонен пыштен – шуктен
Ӱдыр Йошкар-Олаште шочын-кушкын, 24-ше номеран школышто шинчымашым поген. Тунеммыж годым шуко жапым лагерьлаште, тӱрлӧ каныме верыште эртарен.
– Мыланем еҥ-влак коклаште лияш келшен. Кыдалаш класслаште тунеммем годымак команде дене пашам ышташ кумылем улмым шижынам. Кызыт ты опыт тӱрлӧ проект пашам илышыш пуртымо годым сайынак полша. Профессионал шинчымашым Волгатехыште налынам. Тушко тунемаш пураш манын, вузын эртарыме Почмо омса кечышкыже эреак коштынам. Тунам тысе управлений да право факультетын студенткыже лияш шканем цельым шынденам. Тидлан кугыжаныш муниципал управлений специализацийым ойыренам. Менеджмент, вуйлатыме да ты аланысе сомыл-влак эреак сымыстареныт. Вузышто тыгак икымше курсышто тунемше-шамычын наставникышт лийынам. Нуным тӱрлӧ мероприятийыште вӱденам, – каласкала Ю.Шадрина.
«Ыштен кертдыме сомыл уке»
Юлиян усталык корныш шогалме татше лач вузышто пеҥгыдемдалтын. Тудо «Студент шошо», «Университетын миссше» да моло мастарлык конкурсышто чолгалыкше дене ойыртемалтын. Тылеч посна ӱдыр факультетын эн тале студенткыже лӱмым нумалын. Тудын фотографийже тунемме тӧнежысе пырдыжыштат кечен. Студент годымак бренд-влак дене вуйлатыме службышто пашам ышташ тӱҥалын. Тушто маркетинг шотышто сомылым вораҥдарен. Вузым пытарымеке, налме профессийже дене пашам ыштен. Специалистын ойлымыж почеш, айдемын ыштен кертдыме сомылжо уке. Тудо иктаж-молан кӱлынак пижеш гын, чыла ыштен сеҥа. Икмыняр кугу шонымаш-влакым ӱдыр лач тыге илышыш шыҥдарен.
– Кугыжаныш сферыште икмыняр ий тыршымеке, вес аланыш каяш ямде улмемым шижынам. Иктаж-могай организаторский але усталык йыжыҥым шымлымем шуын. Тыгак радиовӱдышӧ семын тыршен ончаш ик эн кугу шонымашем лийын. Ты жапыштак ик радиостанцийыш PR-специалист кӱлмӧ шотышто увертарымашым ужынам да йодмашым колтенам. Мыйым налыныт. Икымше ролик, икымше проект, у аланыште пашам ыштымем чонемлан келшеныт. Тыгодымак радион федеральный школышкыжо радиовӱдышылан шинчымашым налаш йодмашым пуэнам. Тидлан лӱмын кастингым эртенам. Радиовӱдышӧ семын МЭТР радиостанцийыште стажировкым эртенам. Тыге ик кугу шонымашемым илышыш пуртенам, – палдара ӱдыр.
Кинош толмо корно
Юлия университетыште маркетингыште, пашаште кугыжаныш службышто, вара медиаште тыршен. «Марий йомак-влак» проектыш артист-влакым кычалме нерген уверым ужмеке, тушто шкенжым терген ончаш кумылаҥын.
– Ты проектыште могай пашам шуктен кертмем шотышто ятыр шонкаленам. Йодмашым колтымеке, мыланем площадкын администраторжын сомылжым ӱшаненыт. Тунам проект «Ирга» фильмым войзен. Мыланем паша процессым эскераш моткоч келшен. Варажым проект «Чоткар» фильмым шочыктымаште тыршаш тӱҥалын. Тусо жаплан кино пашан чыла гаяк шӧрынжылан ямде лийынам, – ойла продюсер.
«Марий йомак-влак» проектыште Юлия тӱрлӧ ийготан еҥ-шамыч дене пашам ышта. Артист-влакым кычалме, кином сниматлаш верым ойырымо, документ да моло сомылланат мутым куча. Тылеч посна ӱдыр олаште тӱрлӧ мероприятийым, фестивальым организоватла. Тидат тудлан куаным конда, манеш.
– Продюсер паша – моткоч ответственный. Моло специалист-влакын сомылышт шукталтше, илышыш шыҥдаралтше манын, продюсерлан чылажымат ончылгоч ямдылыман. Садлан тудлан моло-влак деч икмыняр йолтошкалтышлан ончылно лийман, – манеш специалист.
Марий кундемыште кино аланын вияҥмыже пытартыш жапыште сайынак шижалтеш. Проект-влаклан кӧра икмыняр фильм ош тӱням ужын, рекламе сынан ятыр ролик войзалтын, «И Краткая» фестиваль да моло кугу мероприятий эртаралтыныт.
– «Марий йомак-влак» проект почеш тений ныл новеллым лукташ шонена. Тидлан ятыр самырык еҥым туныкташ тӱҥалына. Тидыже кундемысе кино пашан ончыкылыкшылан кугу шӱкалтышым ыштен сеҥа. Тылеч ончычсо паша-влакымат палемдыде огеш лий. Нунын коклаште кундемна дене палдарыме клип, кӱчык метражан фильм, «Йошкар-Ола театральная» фестиваль да молат улыт, – каласкала продюсер.
Кеч-могай проект паша вийым, ӱнарым, моштымашым йодеш. Кагазыште тудым ончыкташ – ик сомыл, а илышыш пурташ – весе. Тыште кугу команде тырша. Мутлан, 2025 ийыште «Йошкар-Ола театральная» фестивальлан шӱдӧ наре артистым ик роликыш чумыраш кӱлын. Тидлан икмыняр локацийым келыштараш, образым чоҥаш да молымат шукташ кӱлын. Кум-ныл минут шуйнышо паша шеҥгелне ятыр специалистын тыршымыже «шылеш».
– Кажне фильм, клип, ролик илышыштем кугу кышам коден. Чыла пашан – шкешотан историйже. Тыгодым тӱрлыжат лиеда, садлан тӱҥ пашамлан чылажымат жапыштыже рашемдымаш да сомылым умбакыже шуйымаш шотлалтыт. Мутат уке, чыла тиде моткоч шуко вийым налеш. Но мыланем ты сомыл куаным веле конда. Кино аланым ойырен налмемлан нимынярат ом ӧкынӧ. Шуко уста да поро кумылан еҥ-влак дене палыме лийынам, ятыр оҥай проектым илышыш пуртымашке надырым пыштенам. Ончылно эшеат оҥай да кумда проект-влак вучат. Нунат илышыштем кугу кышам кодат манын ӱшанем, – палемда Юлия Шадрина.
Землячкынан пашаже ятыр еҥлан у сомыл гай, очыни, чучеш. Но продюсерын профессийже кызытсе илышыште, чынжымак, моткоч кӱлешан да йодмашан. Садлан Юлиян пашаже шканже веле огыл, тыгак республикланат куаным конда. Вет тудо кундемнан илышыжым историйыш войзаш полша.
Ю.Шадринан альбомжо гыч налме фото-влак.