Марий Элым Вуйлатыше Юрий Зайцев Звенигово оласе да районысо икмыняр объектыште лийын.
Эмлымверыште
Юрий Зайцев Звениговысо рӱдӧ районный эмлымверысе ӱдырамаш консультацийын у зданийжым ончал лектын. Тудым «Семья» нацпроектын «Охрана материнства и детства» проектше почеш чоҥымо, да лишыл жапыште почшаш улыт. Тыште 11 тӱжем утла ӱдырамашлан медицине полышым пуаш тӱҥалыт.
Варажым Юрий Зайцев самырык медпашаеҥ-шамыч дене вашлийын, да районлаште пашам тӱҥалше медик-влаклан полыш шотышто каҥашеныт. Самырык врач ден фельдшер-влак Звенигово эмлымверыште пашам ыштыме опытышт дене пайлалтыныт, у полыш нерген йодыштыныт.
– Кызыт самырык специалист-влаклан «Единый Россий» партийын Калык программыж почеш полыш пуалтеш. Тушто медицине услуго элнан кажне лукыштыжо йӧнан лийже манын чолган пашам ыштат. «Земский доктор» ден «Земский фельдшер» программе-влак умбакыжат шыҥдаралтыт, а Марий Эл Правительстве дефицитан направлениян медпашаеҥ-влаклан илыме верым саемдаш 3 млн теҥге марте выплатым тӱлаш шона, – палемден Марий Элым Вуйлатыше.
Регионым Вуйлатыше нуным эртыше профессионал пайремышт да шушаш Молодёжь кече дене саламлен. Тыгак здравоохраненийысе объект-влакым уэмдыме ончыкылык планым ойлен.
«Сайвер» химзаводышто
Регионым Вуйлатыше Шолэҥерысе «Сайвер» химзаводын пашаж дене палыме лийын, производствын куатшым аклен.
Ты предприятий 2021 ий годсек «Производительность труда» федеральный проект почеш пашам шукта. Завод импортный поставкым огеш нал, ий гыч ийыш сатум ешарен толеш.
«Сайверыште» 240 утла еҥ строительно-декоративный лакокрасочный материалым ямдыла. Тудо Российысе 20 эн кугу предприятий радамыш пура. Шке сатужым Российысе 44 регионышто да СНГ-се эллаште, поснак Казахстаныште, Беларусьышто, Арменийыште да Киргизийыште ужала.
Предприятий кӱшыл да кыдалаш тунемме заведенийла дене кылым куча. Тысе производственный площадкылаште специалист-влакым ямдылат да шке коллективышкышт самырык-шамычым ушат.
Тыгак спецоперацийланат предриятий полшенак шога. 2023 ий гыч «Сайвер» СВО-ш 1 млн теҥгеаш стройматериалым да чиям налын колтен.
Эльвира Терентьева.
Марий Элым Вуйлатышын пресс-службыжын фотожо.
Юрий Зайцев – самырык медик-влак коклаште.