Тений Волжский районышто «Юлсер кундемын ӱдыржӧ» моторлык да усталык конкурс визымше гана эртаралтын.
Кум ӱдыр
Кодшо ийын Корамас кундемысе Чодраялыште илыше Светлана Алексеевна ден Сергей Александрович Андреевмытын кум ӱдыр кокла гыч эн изи ӱдырышт тушко ушнен, Евгения тунам «Чолга шӱдыр» номинацийыште палемдалтын.
А тений шке мастарлыкшым эн кугурак ӱдырышт Вероника ончыктен. Тудо онлайн-йӱклымаш почеш сеҥен.
Кумытынат чонлан келшыше профессийым налыныт: Вероника – воспитатель, Ирина – повар-технолог, а Евгения – химий анализым ыштыше лаборант.
Ӱдыр-влакын авашт ӱмыр мучко ургызо сомылым шукта. Ачашт ондак верысе озанлыкыште пашам ыштен, а ынде шуко жап тӱрлӧ вере ороллан тырша.
Йочасадыште
Вероника МарГУ-н Дошкольный образований факультетын педагогике да психологий направленийже дене тунемын. Тылеч вара Йошкар-Оласе «Ягодка» йочасадыште воспитательлан шымше ий пашам ышта.
Тушто Вероника Сергеевна икшыве-влакым марла мураш-кушташ кумылаҥдыме дене шкенжынат яндар йӱкшӧ манын умылен. Йочасадыште марий ӱдыр пашаче койышым ончыкта, тӱрлӧ мероприятийыште йоча-влак дене номерым ямдыла, ятыр утреникым эртарен. Кӱшыл категориян воспитатель лийын шуктен.
Такшым изиж годсек Вероника пошкудо ӱдыр-шамычым модыктен. 9-ше да 10-шо класслаште тунеммыж годымат ятырлан изирак йоча-влак окна воктекыже толын шогалыныт да, «Вероника!» манын кычкырлен, уремыш ӱжын луктыныт.
Тений Вероника Сергеевна кокымшо группыжым йочасад гыч ужатен. Ик жапыштак выпускнойлан да моторлык-усталык конкурслан ямдылалтын. Пашаче марий ӱдыр чылажымат шуктен.
Ӱшаным да вийым пуэн
В.Андреева шке районысо моторлык конкурсыш ушнаш ӱмаштак шонен. Тунам шонымашыжым кӧргыштыжӧ гына ашнен. А тений Вероникам Корамас тӱвыра пӧртын пашаеҥже-влак ӱжыныт.
Конкурслан Вероника мурым икымше гана калык ончыко луктын. А йӱкшӧ моторын, лыжган шокта – эре колыштмет веле шуэш.
Пасушто, Элнет эҥер воктене, икманаш, пӱртӱсыштӧ мурым колыштын шинчаш йӧрата. Утларакшым руш мурым чӱкта, но марийын весела семжат чонжылан лишыл.
– Конкурс моткочак келшен, тудо ӱдыр-шамычлан кӱлешан, шонем. Тымарте шкемым калык коклаште лӱдынрак кученам гын, тудо мыланем ӱшаным да вийым ешарен. Нимом ончыде, ончыко каяш кумыл дене илаш таратен, – манеш участнице.
Конкурслан ямдылыме визиткыште ужына: воспитателым икшыве-влак чотак йӧратат. Сылне лӱман марий ӱдырлан пашаштыже эше ятыр сеҥымашым тыланена да волгыдо корно дене ошкылаш Чоткар патыр полшен шогыжо манына.
Снимкыште: Вероника! Ах, Вероника!
Еш альбом гыч налме фото.