Пошкырт кундем Мишкан район Чорай селасе Я.Ялкайн лӱмеш марий гимназийыште марий йылмым да литературым 25 ий туныктышо Анжелика Юзукбаева деч фамилийже нерген йодмылан тыге вашештыш:
– Фамилий нерген кугу шымлымашым ыштен омыл. Юзукбаев фамилий – пелашемын. Кумдан шарлыше огыл. Пошкудо Корак ялыште уло манын колынам. А шкеже ты районысо Кульчубай ял гыч улам, ӱдыр фамилиемже – Байрамова («байрам» татар мут, марлаже «пайрем» лиеш).
Юзукбаев мом ончыкта? «Йозек» татарла «шергаш» манме лиеш. Южышт «йозак» да «бай» мутла ушалтме дене лийын манын палемдат. Вес семынже, йозакым погышо поян.
Ачалийшем пошкудо Тӧлдӧ ял гыч. Ӱмыржӧ мучко Чорай школышто математикым туныктен. Тӧлдӧ ялыштат тыгай фамилиян ик еш гына улмаш. Ачанан Ибутай шольыжын да ватыжын ӱмырышт пеш кӱчык лийын. Кум йочаже кодын. Кувавашт ончен, вара нуно ӧрдыжкӧ каеныт, ӱдыр-шамычын фамилийышт вашталтын. А Владимир Латвийыште служитлен, туштак ешым поген. Вара Москва воктеке куснен, у илышым тӱҥалын, тений мартыште СВО-што йомын.
Чорайыште тыгай фамилий мемнан веле. Таче тиде фамилийым нумалше родына-влак Латвийыште (Даугавпилс олаште), Английыште илат. Тиде мариемын кок шочмо изажын кум йочаже. Вадим Английыште ешыж дене ила (3 изи эргыже уло), Анжела ден Ольга Латвийыште улыт.
Таня акана, марлан лекмеке, вес фамилийым налын. Пелашемын тукымым шуйышаш кугурак Георгий изаже, 23 ияш самырык офицер, Югославийыште локальный сарыште Бендера ола воктене вуйжым пыштен.
Ешна кугу: кызыт пелашем, ныл йочана (эн кугужо посна ила, Уфаште пашам ышта, тыгак авана (мариемын аваже) пырля илена. Юзукбаев фамилийым кызыт мемнан вич йочана нумалеш. Пелашем Андрей Дигитаевич Чорайыштак шочын.
Кугезе кочана фронт гыч пӧртылын огыл. Тудын сарышке кайымыж годым кочана кум ияш лийын, шольыжо – ик ияш. Тыге Юзукбаевмыт тукымышто тӱрлӧ сарын кум участникше уло: Юзукбай Калиевич Калиев,
Георгий Дигитаевич Юзукбаев, Владимир Ибутаевич Юзукбаев. Ме нунын дене кугешнена.
Еш альбом гыч налме фото.
Эльвира Терентьева.