Пытартыш жапыште Российыште энерготерапий манме шарлен. Энерготерапевт, айдемын энергийже дене пашам ыштен, тудын психоэмоциальный да кап тазалыкшым эмла. Ик еҥ энерготерапий шоя манын шона, весе, мӧҥгешла, тидлан ӱшана да чон ден кап тазалыкым пеҥгыдемдаш полша, манеш. Энерготерапий – мо тиде тыгай? Кузе тудо эмла? Тиде да моло нерген телесный терапевт, Звенигово район Пӱнчылӱвал ялын ӱдыржӧ Ирина Смелова дене мутланышна.
– Ирина, кузе тый альтернативный медицине аланыш толынат?
– Тушко корно кужу лийын. Мый МарГУ-со Калыкле культур да тӱвыра кокласе коммуникаций институтым тунем пытаренам. Руш йылме ден литературым да марий йылме ден литературым туныктышо улам. Кызыт кокымшо кӱшыл образованийым Москосо технологический институтышто налам, психолог лияш ямдылалтам.
Самырык улам гынат, илышыштем тӱрлӧ тӧрсыр лийын. Шуко пашам ыштен онченам. Общепитыште, барбершопышто тыршенам, вургем кевытыште ужалыше, парфюм кевытыште кассир лийынам, вожатый, туныктышо пашалаште шкемым кычалынам. Мый палем, мо тиде тыгай окса да полыш деч посна илаш. Пашаш эре кумыл деч посна коштынам. Тидлан кӧра чонем пуйто пустаҥын, илышыштем куан ситен огыл. Эмоционально чот ноенам. Тунам умыленам, кеч-кунар тырше, садыгак чыла оксам ыштен от нал, пиал оксаште огыл.
Мый лӱддымӧ улам. Изинек ял гыч кугу олаш илаш куснымем шуын. Тыге 2019 ийыште шонымашем шукталтын. Ик кечыште, вургемем погалтен, шкетын палыдыме Сочиш илаш кусненам. Но олан моторлыкшым ужын омыл. Пашам эре ыштенам. Кок гана йӧратымашым вашлийынам, но пырля лияш пӱралтын огыл. Интернетыште видеом ужынам, кузе еҥ-влак чытырнат, кычкырат, шортыт, тыгодым шке чоныштым почын каласкалат. Тыге энерготерапийыш толынам. Эн ончыч шкемын чон тургыжланымашем, ӧпкелыкем деч утлаш тыршенам. Варажым тыгаяк нелылык дене тӱкнышӧ еҥ-влаклан полшаш кумылем лектын. Тидлан тунемынам, документыштем телесный энерготерапевт манын возымо.
– Энерготерапий – мо тиде тыгай?
– Тиде юзо дене кылдалтын огыл. Уло психолог, а уло телесный терапевт. Коктынат подсознаний дене пашам ыштат. Но психолог вуй гыч тӱҥалеш, а телесный терапевт – уло кап гыч. Психикын да капын кылышт пеҥгыде. Илышыште лийше кажне неле ситуаций, капыште блок семын кышам кода. Капысе блок – чогашылым ишыктымаш. Айдеме тӱрлӧ шижмашыжым кӧргыштыжӧ кучаш тырша, тидат чогашылыште спазмым луктеш да ӱмыр мучко аралалтеш.
Айдеме, мутлан, кыдал коржмо дене врач деке толеш. Анализым сдатла, а результат сай. Тунам южо врач психолог деке кояш темла. Чон таза гын, кап-кылат пеҥгыде лиеш. Телесный терапевт кыдал коржмым айдемын шыдыжым темдалаш тыршымыж дене умылтара. Мутлан, изиж годым ача-ава йочаштым уда койышан, утыждене виян ойлышо улат манын вурсеныт, шып лияш эре кӱштеныт. Тыгай годым йоча нунылан сыра, но тидым ок ончыкто, кӧргыштыжӧ куча. А кугу лиймеке, чыла тиде тӱжваке лектеш. Икшыве шке шонымашыжым ойлен огеш керт, тудын пуйто оҥылашлужо тӱҥеш. Але сценыште выступатлымыж годым йошкарга, коҥылайымал, кид, йол пӱжалтыт. Тиде чыла капысе блок. Энерготерапевт неле ситуаций-влакым угыч илен лекташ полша, тидын дене капысе блокым кораҥда.
– Мыняр сеанс деч вара айдемылан куштылго лиеш?
– Южылан ик тренингат сита, а южылан шукырак жап кӱлеш. Кажне еҥ мо деч гынат лӱдеш, тургыжлана. Но кажныже нине нелылыкым сеҥен огеш керт. Мый тыгай еҥ-влаклан полшем. Чон кӧргӧ чаракым кораҥден, айдеме пиалан, эрыкан лияш, йӧраташ тунемеш.
– Энерготерапий шоя манын огыт ойло?
– ВК-ште лаштыкем уло. Тушто мый эртарыме тренинг гыч видеоужашым луктам. Ты видеом шукынак ончат. Мый терапий дене Сочи деч посна, Калининградыште, Самарыште, Красноярскыште, Москошто, Озаҥыште, Чебоксарыште, Йошкар-Олаште, Волжскышто лийынам. Шке семын коштмашем уке, ӱжыт, мый толам. Конешне, скептик-влакат шагал огыл улыт. Тиде чыла шоя манын ойлат. Эсогыл экзорцизм дене пуйто заниматлем маныт . Тӱрлым ойленыт. Родем-влакат телесный терапийын пайдажлан ӱшанен кертын огытыл. Шуко палымем, йолташем, родем-влакат мыйын тренингыш коштыныт да умыленыт, телесный терапийлан кӧра кап да чон таза лийыт. Кызытат авамым ужын, мылам таум ойлат. Лач ик палыме ӱдыр сеанс деч вара мылам тиде шоя манын каласен. Но каласыман, тудо иканаште тыште да кызыт лектышым вучен. А тыге чыла еҥ дене огеш лий. Эше ешарыман, энерготерапий деч вара айдеме шке цельже деке ошкылым ыштышаш, а мӧҥгыштӧ тидым вучен шинчышаш огыл.
– Палаш оҥай, а кузе эрта энерготерапий сеанс?
– Терапийыш толшо еҥ эн ончыч чоным корштарыше ситуаций-влакым илен лекшаш. Тидлан мый тудым гипноз огыл, транс состоянийыш пуртем. Эн ончыч ик неле ситуаций, мутлан, намыс деч утлаш шонен, вара весе деч, кумшо деч…Кажне сеанс деч вара чонлан куштылгырак да куштылгырак лиеш. Тунам капым энергий дене темаш шонен толыт. Мутлан, ик еҥ мый декем вашке кугу мероприятий лиеш, а мыйын тудым эртараш вий-куатем ок сите, пу мылам тиде энергийым манын йодеш.
Каласыман, энерготерапийын тӱрлӧ методикыже уло. Иктыже, мутлан, куштымаш гоч. Мый келгынрак пашам ыштем.
– Вес еҥлан вий-куатым пуэн, шканет неле огыл?
– Еҥ дене пашам ыштыме годым мый шкемын нерген ом шоно. Кап блокым кораҥдыме годым еҥ-влак мӱгырен шортыт але кычкырат, але кӱварӱмбалне пӧрдалыт. Нунын дене пырля мый шкежат тиде нелылыкым илен лектам. Сандене шкежат ты шотышто пашам ыштем.
– Тый посна еҥ дене веле пашам ыштет?
– Посна еҥ денат, группо денат, онлайнат, офлайнат пашам ыштем. Тренингым, курсым эртарем. Тушто айдемым шкенжым шке прорабатыватлаш туныктем. Вес ийын кумылан-влакым телесный терапийлан туныкташ тӱҥалнем.
Айдеме таза тунам, кунам чонжат, капшат гармонийыште. Илышысе тӱрлӧ ситуацийым вуйдорык веле огыл, капат шарна. Да, илен-толын, шкеж нерген корштымо гоч ушештара. Тудым кораҥдыман. А тидлан шижмаш дене пашам ыштыман.
Еш альбом гыч налме фото.