ПФО-со законодатель-влак Советын Йошкар-Олаште апрельыште лийшаш заседанийже вашеш Кугыжаныш Погын тӱрлӧ йодышлам лончыла. Ты гана агропромышленный комплексын вияҥме корныжым ончен лекме.
Ты темым Марий Элысе Агропромышленный комплекс, экологий да пӱртӱс дене пайдаланыме комитетын членже-шамыч каҥашеныт. Варажым Юл кундемысе парламентын еҥже-влак ялозанлык комплексым вияҥдымашым сату лӱдыкшыдымылыкын гарантийже да еҥ-влакын илышыштым саемдыме кӱлешан фактор семын ончышаш улыт.
Тӱҥ докладым ялозанлык да кочкыш сату министр Павел Раевский ыштен. Тудо пытартыш вич ийысе пашам иктешлен.
Ик эн сай показатель да сеҥымаш семын экономикын вияҥмыжым палемдыме. Ялозанлыкын валовый региональный продуктшо 13,6 процентым айла. 2025 ийыште ты сферыште 71,7 млрд теҥгеаш кочкыш сатум ыштен налме, тидыже 2021 ий дене таҥастарымаште 1,1 пачаш шукырак.
Вич ийыште АПК-н тӱҥ капиталышкыже 26 млрд теҥге инвестицийым конден кертме. Ты жапыште кугыжаныш полыш 5,9 млрд теҥгешке шуын. 2025 ийыште агропромышленный комплексысе 259 субъектлан полышым пуымо.
Заседанийым иктешлыме годым республикысе АПК-н кугу вий-куатше улмым палемдыме. Депутат-влак специалист-влак шотышто темым федеральный кӱкшытыштӧ каҥашаш кӱлмӧ нерген ойленыт, поснак ялозанлыкыште пашам ыштыше-влаклан илыме верым налаш але чоҥаш полшышо кугыжаныш полыш лийшаш маныныт. Вет тидыже молодёжьым селаште кодаш да квалифицированный специалист-шамычым отрасльыш кондаш сай йӧн лиеш ыле.
Марий Элысе Кугыжаныш Погынын фотожо-влак.