Тыге ойлат «Этномодно» лӱман вургемым ыштыше мастар-влак. Нунын ик шонымашышт – этнический стильым айдемын кажне кечын чийыме образышкышт пурташ полшаш. Тидлан тӱрлеман, ойыртемалтше печатян да ургыман, сай качестван фурнитуран модный вургемым ыштат.
Уста дизайнер
«Этномодно» бренд вургемым шочыктымаште ик шонымашан профессионал команде тырша. Жанна Шпунт дизайнер, Марина Берчанская – модельер, конструктор. Кок мастар еҥ ик проектыш ушнен, пашам вораҥдараш тӱҥалын. Жанна каласкала:
– Мый усталык пашалан кумылан марий ешыште шочын-кушкынам. Ачам Морко, авам Кужэҥер кундемла гыч улыт. Нуно эреак тӱрлӧ кидпашам шуктеныт. Меат, кум ӱдыржӧ, нуным ончен, яра шинчен огынал, эреак иктаж-мом ыштенна, тунемынна. Кугурак акам почеш Йошкар-Оласе 1-ше номеран президентский школын художественный классышкыже тунемаш пуренам. Тушто марий тӱр дене сайынрак палыме лийынам да утларак шымлаш тӱҥалынам.
Школ деч вара акам Йошкар-Оласе технологический колледжыш модельер-конструкторлан, а мый художественный училищыш сӱретчылан тунемаш пуренна. Студент годым акам дене шканна тӱрлӧ вургемым, молын деч ойыртемалтшым урген чиенна. Мый модельым шоненам гын, акам ургымылан мутым кучен. Варажым самырык-влаклан ациональный мотиван вургем коллекций теме почеш диплом пашамат араленам.
Тылеч вара Москошто «декоративно-прикладной сымыктышын художникше» специальность почеш шинчымашем нӧлтенам. Тыге графический дизайныш, иллюстрацийыш вуйге пуреҥгаенам. Ты алан тачат мыйын тӱҥ пашамлан шотлалтеш. Но чонлан келшыше сомыл-влак: тӱрлымаш, ургымаш, шке кид дене иктаж-мом шочыктымаш – эреак пеленем улыт. Нуным «Этномодно» проектыште вораҥдарем. Шке проект пашам тӱҥалме деч ончыч Москошто ик модельер дене дизайнерлан тыршенам. Тушто пашам ыштыме опытем модысо тренд-влакым шочыктымаште, ум шонен лукмаште сайынак полшеныт.
Этнотемым шымлыме шотышто Жанна шинчымашыжым сайынак пойдарен. Тидлан ӱдыр кызытсе книга-влаклан эҥертен, лекций-шамычым колыштын. Тӱрлымаште да композиций-влакым шочыктымаште усталыкшым нӧлташ полшымаште туныктышыжо Алла Алексеевна Орловалан таушта.
Профессионал тӱрлызӧ да ургызо
«Этномодно» проектын вес профессионал еҥже – Марина Берчанская. Тудо ургымылан, тӱрлымылан, вургем качествылан мутым куча. Маринан ты профессийыште паша опытшо кугу. Проект деч ончыч тӱрлымӧ да ургымо сомылым вораҥдарен.
– Профессием почеш модельер-конструктор улам. У Торъял кундемысе марий ешыште шочын-кушкынам. Жанна дене студент годсек келшена, пелашна-влакат мыланна эреак полшен шогат.
Тӱҥ шотышто футболкым, тувырым, юбкым, брюкым, свитшотым, шопперым ургена. Коллекцийым у вургем-влак дене пойдараш шуко жап кӱлеш, тидын шотышо ме тыршена. Мемнан брендын ойыртемже – кажне кечылан чияш келыштаралтше вургем. Вет дизайнерский вургемым пайрем кечын веле огыл, тыглай кечынат чияш лиеш. Ойыртемалтше дизайн гоч самырык еҥ-шамыч шке тукымвожыштым палышт да модный вургемым чийышт манын тыршена, – ойла Марина.
«Этнобренд» сатум официально регистрироватлыме. Ӱдыр-влакын сатуштым кызытеш ВК-се онлайн-кевыт гоч веле налаш лиеш. Тыгак кундемыштына эртаралтше тӱрлӧ ярмиҥгаште нуно вашлиялтыт.
– Ончыкыжым у модельым, принтым пурташ шонена. Этно темым умбакыжат вияҥдынена. Марий орнаментан веле огыл, татар, руш калык-влакын мотивышт почеш вургемым ышташ кумыл уло, – палемдат Жанна ден Марина.
Кажне кечын мотор да сай качестван вургемым чийынет, тыгодым кӧ улметым ончыктеныт? Тугеже могай вургем ӱмбалнет лийшаш – ынде палет.