22-28 июнь – Наркотический средства дене пайдаланыме шотышто профилактике арня (26 июнь – Наркотический средства дене утыждене пайдаланыме да тудым закондымын шаркалыме тӱнямбал кече – вашеш).
Психоактивный вещества-влак деч, ты радамыш наркотикымат пуртыман, зависитлыме – хронический, эре вияҥше да жапын-жапын шкеж нерген палдарыше чер. Тыгодым айдемын капкылже веле огыл, психикыжат эмганат, йыр улшо еҥ-влак дене кыл пужла. Ты чер да тудыч деч кузе утлымо нерген Марий Эл Республикысе тӱҥ внештатный психиатр-нарколог Светлана Путилова палдара.
Химический зависимостьын тӱҥ палыже – наркотик, алкоголь да вуйушым аҥыртыше моло вещества дек чот шупшмаш. Тыге психический да физический зависитлымаш шочеш.
Вуйушым аҥыртарыше вещества-влак (наркотик, алкоголь) дене пайдаланаш шонымаш тӱҥ лиеш, чыла молыжо ӧрдыжыш шӱкалалтеш. Психоактивный веществам приниматлымеке, айдемын шонен кертмыже начарештеш, кумылжо да койышыжо вашталтыт. Вуйушыжым аҥыртен, айдеме чон поянлык нергенат монда – лишыл еҥже-влакым ондалаш тӱҥалеш, эре сыра, осал пашам ышта. Черлыеҥ тиддеч шке гыч утлен ок керт. Психоактивный вещества влак деч йӧршеш отказатлалташ специалист-шамычын (психиатр-наркологын, психотерапевтын, медицинский психологын) полышыштлан эҥертыман.
Капкыл да вуйушат эмганымым шотыш налын, эмлымаш комплексный да этап дене лийшаш. Тушко медикамент дене эмлыме терапийым да психотерапийым, кужу жап шуйнышо медицине реабилитацийым пуртыман. Нине методике-влак Республикысе наркодиспансерын наркологический расстройстван черлыеҥ-влаклан отделенийыштыже кучылталтыт.
Эмлыме-реабилитационный программе-влак черлыеҥлан психоактивный вещества деч кораҥаш полшат, тыгак ару вуйуш дене илаш, ончыко ошкылым ышташ, шке тазалыклан мут кучаш туныктат.
Программе почеш лекций-влакым лудыт. Тренинг, тӱшка да посна келыштарыме занятий-влак, физиотерапий, паша терапий, физкультур занятий-влак эртаралтыт. Черлыеҥ-шамыч айыквуя илаш да тиддеч куаным налаш тунемыт. Медицине реабилитаций отделенийыште черлыеҥ-влаклан специалист-шамыч сутка мучко полшат.
Стационар гыч лекмекыжат, черлыеҥ психиатр-нарколог дене тергалтшаш да реабилитаций программым умбакыже шуйышаш. Тидым Республикысе наркодиспансерын диспансерно-поликлинический отделенийыштыже ышташ лиеш.
Диспансерын специалистше-влак полышым йодын толшо кажне еҥлан полшат.
Диспансерно-поликлинический отделенийын регистратурыжын телефон номерже – 8 (8362) 45-21-63.
Медицине реабилитаций отделенийын телефон номерже – 8 (8362) 57-36-21.
Специалист-влак деч полышым йодмым эрлалан ида кодо: ондакрак эмлалташ тӱҥалыда – черым сеҥен кертыда!