Угинде пайремын конкурсыштыжо «Эн тамле кинде» номинацийыште Кужэҥер район Салтакъялыште илыше Людмила Иванова сеҥышыш лектын. Тудо эше икмыняр ий ондакак «Ялысе маркет» сообществым почын.
– Киндым ру дене ом ыште, закваске дене ямдылем. Ожно сӱаным, унам тичмаш кинде дене вашлийыныт. Кызыт мотор каравай модышко пурен. Сандене ожнысо тичмаш кинде ден кызытсе жаплан келшыше, пеледыш, лышташ да айстинг дене сӧрастарыме каравайым калыклан ончыктенам.
Мый самозанятый улам, киндым пыштем, мелнам кӱэштам, тортым ыштем. Ондакше чывым ончен ужаленам. Киндым ожнысо семын шукертсек пыштем. Изи годым авамын пыштыме киндыжым йӧратенна. Коҥга гыч вигак луктын, йӱштӧ шӧр дене кочкаш пеш тамлын чучын.
Вара пагыт тыгае ыле: пашадарым ышт тӱлӧ, окса уке, киндым шке пыштена. Ава кунам ярсен огыл, кузе ыштышашым умылтарен, да ме шогылтынна. Ава почешак мелнам кӱэшташ тунемынна. Тудо тортымат ыштен. Вет ялышке ондак пешыже конден огытыл, а олашке толын шуына гын, мыланна огешат код ыле. Тидым шарналтен, шке тортым ышташ кумылаҥынам, вара вес рецепт почешат кӱэштынам. Кызытсе жаплан келшыше кочкышым ямдылаш оксала курсым наледенам, – ойла Людмила Валерьевна.
Тыгак Л.В.Иванова самырык-влакым ты пайремыш конден. Тудо школышто ӱдыр-влакым кушташ туныкта. Лачак тиде «Изи шӱдыр» ансамбль мастарлыкшым ончыктыш.