21 августышто Сахалиныште студент-шамычын «Оха» регион-влак кокласе путинный отрядыштын пашаштым торжественно петырыме. Тушко ушнышо Марий Элысе «Остров свободы» отряд сеҥыше-влак радамыш логалын, а отрядын комиссарже Елизавета Малышева эн сай комиссар лӱмым сулен.
Командыште пашам ыштен
Мӱндыр Эрвел федеральный округысо (ДФО) студенческий путинный отряд-влак – Российысе кугу студотряд движенийын ик ужашыже. Тушко ушнен, самырык ӱдыр-рвезе-влак Сахалиныште кугу предприятийлаште тыршен, оксам ыштен налын кертыт, пашазе профессийлан шӱмаҥыт. ДФО-со студотряд-влакын штабышт колым перерабатыватлыме аланыште пашазе проект-влакым илышыш шыҥдара. Ты проектлаш кажне ийын элнан 63 регионжо гыч 5000 утла участник ушна.
Тений 1 июль гыч 20 август марте Марий Эл гыч «Остров свободы» студотрядын чолга еҥже-влак «Оха» проектыште участвоватленыт, Сахалинысе колым перерабатыватлыме предприятийлаште мастарлыкыштым, пашам ыштен моштымыштым, профессионал улмыштым ончыктеныт. «Остров свободы» показатель-влак почеш эн сай отряд лийын.
У вер, у опыт
«Оха» проектын эн сай комиссаржылан тений ПГТУ-н студенткыже Елизавета Малышевам шотлымо. Киров кундемын шочшыжо архитекторлан кокымшо курсышто тунемеш. 2025 ий годсек Елизавета – студотрядын еҥже. Тудо ойла:
– Студотряд движенийын ужашыже лияш эре шоненам. 2025 ийыште шыжым йолташем-влак у отрядым чумыреныт да тушко мыйымат ӱжыныт. Тушко кумылан чыла студент ушнен кертеш. Тӱҥжӧ самырык еҥын кеҥежым пайдалын эртараш, отрядын илышыштыже шкенжым ончыкташ, у опытым налаш, пашадарым ышташ кумылжо лийшаш. Отрядыш идалык мучко еҥым погат. Вузлаште, колледжлаште шкенан нерген палдарена. Вконтакте соцкылыште официальный сообществына уло. Тушто отрядын участникше-влак дене палыме лияш йӧн уло. Мемнан «Остров свободы» путинный отрядна командыште у еҥлан эре куана! Кызыт отрядыштына 12 еҥ шотлалтеш.
Е.Малышева тыгай кугу проектыште икымше гана участвоватлен.
– У вер, у еҥ-влак, у опыт. Паша куштылгыжак огыл. Тудо мемнан пеҥгыдылыкнам, моштымашнам терген. Но чыла нелылыкым сеҥен лекмеке, чонышто куан тул ылыжеш, шке вийлан ӱшан шочеш.
Отрядна колым перерабатыватлыме ик заводышто тыршен. Мый предприятийыште мӧртньым ойыркаленам. Сахалиныште кол шукак огыл. Сандене паша графикна шкешотан лийын. Заводыш колым конденыт гын, ме пашаш лектынна, уке гын, жапым шкалан ойыренна. Паша деч посна спорт, усталык мероприятий-влак эртаралтыныт. Тушкат кумылын ушненна. Отрядна – виян, мыскарам ышташ йӧратыше, пашаче. Тидыжым тӱрлӧ грамот пеҥгыдемда. Мемнан мастареҥна Екатерина Колчанова «Оха» проектыште эн сай мастер лийын. Рвезе-влак спорт конкурслаште икымше верлам налыныт. Дмитрий Галкин проектын эн сай боецше лӱмым сулен, а Дарья Попова – проектын эн сай пресс-рӱдерже лӱмым.
Отрядна дене кугешнем. Ончыкшымат тудын дене тӱрлӧ проектыш ушнаш, у кӱкшытыш шуаш шонем, – манеш Елизавета.
Марий Элысе студотряд движенийлан тений – 60 ий. Студентна-влак эре чолга, чулым да пашалан кожмак лийыныт. Но кугу кӱкшытан мероприятий гыч сеҥымаш тистым лач кокымшо гана конденыт. Лӱмгече идалыкыште тидым ыштен кертмаш чоным поснак куандара.