Медведево район Песчаный посёлкышто верланыше В.Дубинин лӱмеш лагерьын вожатыйже Екатерина Лесникова «Российысе эн сай вожатый-2026» всероссийский конкурсышто сеҥен.
Йоча воктене гына огыл
Тудо конкурсын кум йыжыҥжым эртен. Кажне регион гыч ик сеҥышым палемдыме, Марий Эл деч Екатерина ойыртемалтын. Тидыже ӱдырын профессионал да шке пашалан ӱшанле, усталык шӱлышан улмыж, йочам йӧратымыж нерген пеҥгыдемда.
– МарГУ-што «Педагогическое образование» направлений дене икымше курсым тунем пытарымеке (а тушто кок профиль, историй ден обществознаний, дене тунемынам), икымше гана Володя Дубинин лӱмеш лагерьыш практикым эрташ миенам. Тунам нимогай опыт уке, а у да кӱлешан пашалан тунемаш кугу кумыл лийын. Тӱҥжӧ – йочалан куаным кондаш, тудлан тӱткышым ойыраш, нуным йӧраташ. Тыге илышыштем вожатый паша тӱҥале.
Тиде лагерьым икшыве-влак йӧратеныт. А мыйым тысе весела шӱлыш куандарен. Тыге ик кеҥежымат лагерь деч посна эртарен омыл, вожатый семын кум гана пӧртыльым.
2025 ий годсек лагерьыште координатор да кугурак воспитатель семын ыштем. Ынде задачем – йоча воктене гына лияш огыл, моло вожатыйлан полшыман, программе-влакым ямдылыман, командым туныктыман да шке моштымем дене пайлалтман, – каласкалыш Екатерина Витальевна.
Весым туныкта
Вожатый пашам Е.Лесникова кӧргӧ гычак пала, сандене МарГУ-со психолого-педагогический класслаште тудым туныктен. А тений Вожатый-влак школышто лектор лийын. Тидыжым самырык ӱдыр кӱкшын акла, вет ала-кунам шкежат нимом палыдыме толын, а кызыт ты профессийыште икымше ошкылым ыштыше-шамычлан полша.
Екатерина Витальевна Волжск оласе шочмо школыштыжо (4-ше номеран школ) кокымшо ий тырша. Тудо директорын йоча мер ушемла дене кылым ыштыме да воспитаний шотышто советник. Йоча-влакым чолга лияш, шке таҥаш да еҥ ончылно выступатлаш, улан тунемаш, инициативым ончыкташ кумылаҥда.
– Тек кажне йочан келшыме пашажым муаш йӧнжӧ лиеш. Тыгак тудо пайдале улмыжым шижше, шонымашыже шукталтше. Занятийлам йочам йӧратымаш иктыш уша. Йоча жапышт чолган, икте-весе дене келшен да ятыр куан дене эртыже. Тидын верч сай шарнымашым кодаш манын, мероприятийлам эртараш да профессионал задаче-влакым шукташ тыршем, – манеш педагог.
Е.Лесникова 2026 ийыште МарГУ-м йошкар диплом дене тунем пытарен. Яра жапше лектеш гын, лишыл еҥже-влак дене вашлиеш але книгам лудеш, тыгак ум пален налаш тырша, путешествоватла. Санденак шӱм-чонжылан лагерь илыш лишыл: тушто эре изи путешествий семын шижалтеш да кажне кече у историйлан поян лиеш.
– Ала-кунам вожатый паша мылам практике семын тӱҥалын да, моткоч кугу корным сулен, профессий марте кушкаш полшен. Тудым илышын школжылан да шке ужашемлан шотлем, – иктешлыш шке каласкалымыжым Екатерина Лесникова.
Теве тудо – кундемнан эн сай вожатыйже!