2024 ий годсек «Защитники Отечества» фонд элым аралыме йӱлам шуйышо тукым-влаклан кугу тӱткышым ойыра. Тыге «Наследники Победителей» медиапроект илышыш пурталтын. Тушто Шочмо элым аралыше еш-влакын йӱлашт дене тукым гыч тукымыш палдарат.
Элым аралаш – профессий
Ты проектын ик участникше – специальный военный операцийын ветеранже Александр Васьков. Тудо Донецк Калык Республикысе Сладкое селам тушман деч утараш полшымаште лӱддымылыкым ончыктымыжлан Патырлык орден дене палемдалтын. Кугу Ачамланде сар годым тудын кочажат Украина мландым фашист-влак деч аралымаште тале кредалмаште участвоватлен.
2022 ий августышто Александр СВО-ш шке кумылын каен. Кадровый военный тунам Итуруп отрошто службым эртен. Кунам СВО-со ситуаций нелемын, тудым пырля службым эртыше йолташыже-шамыч дене пырля ДНР-ыш командировкыш колтеныт. Сарысе нелылыкым ужын, салтак-влак тушко кодаш кумылаҥыныт. Нуным штурмовой отрядыш палемденыт. А тыгай отряд-влакым тушманын обороныжым чактарымашке эн ончыч колтат.
Землякна ДНР-ыште боевой действий-влак кайыме ик эн стратегический направленийышке, Угледарскийышке, логалын. Ты кумдык тушманын кугу укрепрайонжылан шотлалтын. Тысе кредалмаш-влак кайыме годым салтак нелын сусырген.
– Угледарский направленийыште кредалмына годым Сладкое селам йомдарымаш деч посна налын кертынна. Тунам мемнам Юмо сайынак арален, – шарналта Александр.
Селам утарыме годым лӱддымылыкым да патырлыкым ончыктымылан Васьковым Патырлык орден дене палемденыт. 2022 ий шыжым нелын сусыргышо салтак ятыр жап Бурденко лӱмеш нейрохирургий институт пеленысе госпитальыште эмлалтын. Тудо кок ий наре тазалыкшым шотыш конден.
– Госпитальыште могай-гына салтак-влакым от уж. Мый денем пырля кок йолге да пел кид деч посна кодшо пӧръеҥ лийын. Тудо джойстик кресло полшымыж дене веле ик вер гыч весыш тарванылын. Тунам шкемын сусырем тудын дене таҥастарымаште кӱлдымаш манын шоналтенам. Садлан ятыр жап эмлалтме деч вара мӧҥгӧ пӧртылмеке, шкемым кучашак тыршенам. Такшым мый ӱмырем мучко оптимист улам, но тушто мом ышталтмым ужын толмеке, пеҥгыдынрак шогаш тыршенам, – ойла ветеран.
Кочан корныж дене
Шочмо кундемыш пӧртылмеке, Александр «Защитники Отечества» фондын Марий кундемысе филиалышкыже йодын миен. Тушто тудо моло ветеран-влак дене палыме лийын да тӱрлӧ мероприятийышке ушнаш тӱҥалын.
– Ме чылан гаяк келшена, спорт дене заниматлена. Тыйым умылышо еҥ-шамыч дене кылым ыштымаш моткоч кӱлешан паша, шонем.
Элым аралышын профессийжым ойыренам гын, мый спецоперацийыште обязательно лийшаш улам ыле. Вет военный-влакын тидыже ик эн тӱҥ задачыштлан шотлалтеш, – радамла А.Васьков.
Александрлан военный корным ойырен налмыжат вучыдымо огыл. Тудын кочаже Юрий Васильевич Черкасов Кугу Ачамланде сарым эртен. 17 ийыш шушо рвезе 1943 ийыште фронтыш каен. Сар мучашлалтмешке, гвардеец-десантник лийын. Йошкар Армийын составше дене Украинысе фронтышто фашист-влак ваштареш талын шоген. Тыгак Венгрийым немыч-захватчик-влак деч эрыктымаште лӱддымылыкым ончыктен.
– Авам кочамын сарыште кредалмыж нерген мыланем изи улмем годымак каласкалаш тӱҥалын. Тудо 1925 ий 18 мартыште шочын. Самырыкак тушман ваштареш кредалын.
Мыйынат тудын гаяк сарыште йолем эмганен. Кочамын пӧртылмекыже, ончыч пел йолжым, вара весыжым пӱчкыныт. Сарыште патырлыкым ончыктымыжлан тудым Отечественный сарын II степенян орденже дене палемденыт, – каласкала салтак.
Александр Васьковын кочаже Юрий Васильевич 1992 ийыште илыш гыч каен. Тунам ветеран эше изирак лийын. Туге гынат герой кочажым ужын кодын. Ты ешыште Кугу Отечественный сарын ветеранже нерген шарнымаш тачат аралалтеш. Лач тыге элым аралыше-влакын подвигышт тукым гыч тукымыш илаш тӱҥалеш.