Ӱпӧ олаште 16 ияш марте атлет-влак коклаште греко-римский кучедалмаш дене Российын первенствыже лийын. Тудо Россий Герой Максим Серафимовым шарныме лӱмеш эртаралтын.
Таҥасымашыш элнан 60 регионжо гыч 570 наре спортсмен чумырген. Нуно 32 гыч 110 килограмм марте нелытан-влак коклаште 15 категорийыште вийыштым тергеныт. Юл кундем федеральный округысо спортсмен-влакын чапыштым Марий Элысе Олимпийский резерв школын ныл воспитанникше арален. Нуно Российын сулло тренерже Александр Серяков да Россий спорт мастер Марс Сабитов дене мастарлыкыштым таптат. Волжск ола гыч Дмитрий Дерябин (52 кг) ты турнирыште шӧртньӧ медальым, Константин Иринов (57 кг) ший медальым сеҥеныт. Спортсмен-влакым Российын юношеский сборный командышкыже пуртымо.
Марий Элысе Спорт министерствын сайтше гыч налме фото.