23 майыште Йошкар-Олаште тунемше-шамычын «Умницы и умники Земли Марийской» регионысо гуманитарный олимпиадышт лийын.
10-шо классыште тунемше 22 йоча шинчымашыжым терген. Сеҥыше-влак коклаште – Параньга школын тунемшыже Алсу Сиразиева.
– Алсу, «Умницы и умники» телевизионный модыш нерген шке шонымашетым ойло. Тудлан кузе ямдылалтынат?
– Олимпиаде композитор Андрей Эшпайын творчествыжлан пӧлеклалтын ыле. Моткоч келшен. Тудо эртыме жапыште ик татланат лушкен омыл. Вӱрыштем адреналин «модмым» шижынам.
Ты телепередачым Первый канал дене ача-авам дене пырля изинек ончаш йӧратем. Олимпиадылан шке семын ямдылалтынам. Тӱрлӧ статьям, книгам лудынам. Тылеч посна шошымак талантан йоча да самырык тукымлан «Волгенче» рӱдерыште – «Лесная сказка» лагерьыште – «Умники.ру» да «Гармония слова» ешартыш общеобразовательный программе-влак почеш Андрей Эшпайын илышыжлан да усталык корныжлан пӧлеклалтше профильный смене эртен. Тушко мыят ушненам ыле.
– Регионысо гуманитарный модмашке «Умницы и умники» телевизионный передачын авторжо да вӱдышыжӧ Юрий Вяземский толын. Палыме еҥ дене вашлиймаш чоныштет могай кышам коден?
– Тыгай еҥым ужаш, тудым телевизор гоч огыл, а ваштареш шоген колышташ – кугу куан да пиал. Юрий Павлович – оҥай айдеме. Мыйым тудо пӱсӧ уш-акылже дене ӧрыктарен. Тылеч посна телевӱдышӧ икмыняр йот йылмым пала. Передачыште немыч да француз йылмыла дене шке шонымашыжым ойлен. Тунемше-влак дене чон почын шыман мутланен.
– Шыжым Москошто телевизионный гуманитарный олимпиадын 35-ше тургымжо эрта. Тыят тушто участник лият. Ончыкылык модышын темыже могай лиеш?
– Участник-влаклан тидын шотышто эше ойлен огытыл. Кызытеш ом пале.
– Алсу, тӱрлӧ конкурсышто мастарлыкетым ончыктет докан. Чон-кумыл пашат нерген палдаре.
– Историй ден обществознаний предметлам чот йӧратем. Пытартыш кум ийыште нине предмет дене школысо да районысо олимпиадылаште шинчымашем тергем, призёр да сеҥыше радамыш эре лектам.
Российысе Генпрокуратур «Артек» тӱнямбал йоча рӱдер дене пырля «Юный правовед» ешартыш общеразвивающий программым илышыш шыҥдара. Тушко ушнаш манын, конкурсым эртыман. Тений ты конкурсышто мыят сеҥышыш лектынам да «Артекын» визымше сменышкыже (тудо майыште лийын) путёвко дене суапландаралтынам.
Ӱстембал теннислан тӱҥалтыш класслаште кумылаҥынам. А 6-шо классыште спортын ты видше дене профессионально заниматлаш тӱҥалынам. Тений ӱстембал теннис дене Марий Элысе Кубок верч таҥасымаште кум разрядыште абсолютный чемпион лийынам.
Алсу Сиразиева – чолга тунемше да спортсменке. «Умницы и умники» телеолимпиадыштат шкенжым сайын ончыкта манын ӱшанена. Вет тушто сеҥымаш йочалан льгото почеш Россий Йотэл паша министерствысе МГИМО-ш тунемаш пураш йӧным пуа. А Алсу изинек юрист лияш шона.