Йошкар-Олаште илыше А.Песоцкий ынде ятыр ий электриклан пашам ышта. Пӧртлаш, офислаш электровоштырым шупшеш, тоштым улан вашталта. Пашаш ешге коштыт, манаш лиеш, Александр Николаевичын кок эргыжат ты пашаштак тырша.
Лийын военный, ынде – электрик
Такшым пӧръеҥ Чита олаште шочын. Ачаже военный лийын, садлан рвезын кум ияшыж годым ешышт Йошкар-Олаш илаш куснен.
Ачаж семынак военный лияш шонен, А.Песоцкий Пермь оласе ик военный училищым тунем лектын. Да Марий Элысе воинский частьыште пашам ышташ пӧртылын. Службылан 20 ийым пӧлеклен.
2008 ийыште сулен налме канышыш лекмеке, ик жап автосервисыште пашам ыштен, вес вереат шкенжым терген ончен.
– Йолташемын шке фирмыже уло, тудо тушко электриклан пашаш ӱжын. Вет училищыште, варажым армийыштат ты профессийлан тунемынам, кӱлеш документем уло, Ростехнадзорат ты профессийыште тыршаш разрешенийым пуэн, – палдара А.Песоцкий.
Саде фирмыште электрик тӱҥ инженер марте кушкын. Оршанке район Табашино селаште нефтеперегонный заводым чоҥымаштат тыршен. Йӱштыштат пашам ышташ, неле кабельым мыняр нумалашыже логалын. Туштак тупрӱдӧ пӧшырым «муынам», пелий киенам манын палдара пӧръеҥ.
Ачаштын корныж дене
Вара уэш пашаш пӧртылын. Ӱнар улмыла чучеш – пашам ышта. Уке гын, кана. Кок эргыже тудлан – ӱшанле эҥертыш, полыш.
Кугуракше, Дима, ПГТУ-м «Электроника. Наноэлектроника» специальность дене тунем пытарен, вара Москошто шинчымашыжым нӧлтен.
– Специальностьын кузе маналтмыже келшен, адакшым электрике дене кылдалтше тӱрлӧ арверым йӧратем, садланак ты профессийым ойырен налынам. Ачам пелен школ годсек пашаш коштам. Туддене ӱшанле, кунам йодам, эре шот дене умылтара, полша, – манеш рвезе.
Дима эше медицине оборудований-влакым вераҥдыме фирмыште пашам ышта. Республикысе оласе, районласе эмлымверлаште шергакан медоборудований ден прибор-влакым вераҥда. Пашаже неле да кугу ответственностьым йодеш гынат, Дмитрийлан келша.
А.Песоцкийын изирак Андрей эргыже кандашымше классыш веле вончен гынат, тудлан ачаж ден изаже ятыр сомылым ӱшанат. Рвезе кумшо кеҥеж каникул тыге пашам ышта. Шке пӱжвӱд дене ыштен налме окса дене шкаланже компьютерымат налын.
Йоҥылышлан вер уке
– Элекрик – лӱдыкшӧ профессий. Иктаж-мом йоҥылыш ыштен колтет – тунамак перен пуа. Садлан пашанам сапёр денат таҥастараш лиеш. 220 Вольт тунар шучкыжак огыл, 6 але10 килоВольт перен пуа гын, чынжымак шучко, илыш денат чеверласаш лиеш. Мый денемат икмыняр гана тыге лийын. Тыгай годым шинчам почат – сай, тугеже илыше улат, – мыскарам ыштен пелешта пӧръеҥ.
Садлан Андрейым лӱдыкшыдымӧ объектыште гына, напряженийым чарыме верыште, пашам ыштыктат. Напряженийым чӱктымӧ гын, розетке дек мияш ок лий.
Песоцкиймытын паша кечышт огыл, арняшт да тылзыштат молын деч ойыртемалтеш. Иктаж объектыште, мутлан, паша процессым чарен шогалташ огыл манын, кастене, кунам чылан паша гыч каят, да южгунам йӱдымат лекташышт логалеш. Тидлан нуно вуйым огыт шупш, медик, пожарный-шамычат йӱдвошт дежуритлат манын вашештат. Вет электрик-влакымат, еҥ-шамыч вашкеполыш семынак ӱжыктат: розетке шаланен, да холодильник, компьютер огыт чӱкталт – тыманмеш йыҥгыртат.
Песоцкиймыт шукыж годым частный пӧртлаште электричествым шупшыт. Тошто электровоштырым вашталтыме дене таҥастарымаште чоҥымо веле пӧртыш у электросетьым шупшаш йӧнанрак маныт нуно: мебельым кораҥден кийыман огыл, тидыжак мом шога.
– Электрик ласка койышан лийшаш, шонем, тургыжланыман, сырыман огыл. Да эре палыман: кушто напряжений уло, кушто уке. Электричестве дене пашам ыштыме годым йоҥылыш лийме южгунам илышымат шога, садлан вуйуш эре «кызыт да тыштак» лийшаш, каваште чоҥештылман огыл. А мӧҥгыштӧ электричестве дене нелылык лектын гын, шке пургедман огыл, специалистым ӱжыктыман, – манеш специалист.
Абрикос, персик, грушо…
Александрын чоным кандарыме верже – Йошкар-Ола воктенысе сад участкыже. Пелашыже тушто утларакшым пакчасаскам кушта гын, пӧръеҥ – грушым, абрикосым, персикым. 2015 ийыште нӧшмӧ дене шындыме абрикос пушеҥгыже шере саска дене куандара. Сад-пакча пашаж нерген А.Песоцкий интернетыште видеоблогымат вӱда. Мланде пашам йӧратымыже ачаж деч куснен: тудат шке жапыштыже садым шынден, мӱкшым ончен.
– Электрик огыл гын, автосервисыште пашам ыштем ыле. Кеч тиде лавыра паша гынат. Такшым электрикланат шуко пуракым шӱлаш логалеш, – манеш пӧръеҥ.
Александр Николаевичым пашаштыже мыланемат эскераш логалын. Шке пашажым шот дене, вашкыде шукта. Тыгодым эргыже-влак йоҥылыш ыштен колтат гынат, йӱкым ок кугемде, ласкан умылтара, ончыкта. Пӧръеҥ эшежым мыскарам ышташ йӧрата. А тиде кеч-могай пашам куштылемда.