РФ Правительстве Председательын алмаштышыже Дмитрий Чернышенко совещанийым эртарен, тушко Марий Элым Вуйлатыше Юрий Зайцеват ушнен. Тушто кеҥежым тазалыкым пеҥгыдемдыме кампаний, ЕГЭ-м эртарыме да образований объект-влакым чоҥымо нерген йодыш-влакым рашемденыт.
Марий Элыште 9-ше да 11-ше класслаште тунемше 10 тӱжем наре выпускник тений ГИА-м сдатла. ЕГЭ-м сдатлаш 2,9 тӱжем наре еҥым регистрироватлыме, экзаменым эртараш 103 пунктым ямдылыме.
Республикыште йоча-влак тазалыкым пеҥгыдемдыме 205 организаций уло, тушто 26 тӱжем наре икшыве кана. 2026 ийыште «Радужный» рӱдерысе медпункт ден столовыйым олмыктат, «Сосновая роща» лагерьыште писын чоҥымо корпус-влакым нӧлтат. Тидлан федеральный бюджет гыч 106 млн наре теҥгем ойырымо.
«Молодёжь и дети» да «Семья» нацпроект-влак почеш тений 27 туныктымо организацийым капитально олмыктышаш улыт. Тыгак Йошкар-Олаште 9А микрорайонышто школым чоҥат. «Инфраструктура для жизни» нацпроект почеш рӱдолаштак 6-шо микрорайонышто школ чоҥалтеш.