«Юнармий» толкынлан 10 ий теммылан пӧлеклалтше эше ик мероприятий Йошкар-Олаште эртаралтын – юнармейский подготовко рӱдерым, «Юнармий пӧртым», почыныт.
Рӱдоласе Дружба уремыште верланыше пӧртыштӧ военный историй, гражданский обороно, инженерно-сапёрный да парашютный подготовко, тактический медицине дене занятийлам эртараш класс-влакым келыштарыме. Рӱдерыште тыгак электронный тир да спортзал улыт. Юнармеец-влаклан ты пӧртым «Авангард» самырык-влакым военно-патриотический шӱлышеш куштымо рӱдерын кокымшо корпусыштыжо почыныт. Тудым капитально олмыктымо деч вара шукерте огыл почыныт.
Мероприятийыш Марий Элысе 17 муниципальный образований гыч юнармеец-влак толыныт. Ӱдыр-рвезе-влакым саламлаш Марий Элым Вуйлатыше Ю.Зайцев миен.
– Юнармий пӧртым почмо моткоч кӱлешан. Эше 10 ий ончыч Марий Элыште посна отряд-влак гына лийыныт, мероприятий-влак шуэн эртаралтыныт. Ты Пӧрт патриотизм шӱлышан да поро кумылым ончыктымо пашам умбакыже эшеат кумдан виктараш, ветеран-влаклан полшаш да моло мероприятийым эртараш полшаш тӱҥалеш. Тыланда виян да пеҥгыде лияш тыланем, – ойлен Вуйлатыше ӱдыр-рвезе-шамычлан.
Йошкар-Ола воктенысе Семёновка селасе В.С.Архипов лӱмеш школын юнармеецше-влакат ты мероприятийыш толыныт. Нунын коклаште – барабанщик-влак отряд гыч Виктория Кузьмина, Ксения Захарова да Маргарита Швелёва.
Юнармий направлениян классыште тунемаш ӱдыр-влак изирак класслаште тунеммышт годымак шоненыт – школысо юнармеец-влакым куанен да кугешнен онченыт. Маргаритан гын Константин изаже юнармеец лийын.
– Тунемме деч посна тӱрлӧ мероприятийыш ушнена, таҥасымашлаште шкенам тергена. Тыге утларак жапым пырля эртарен, икте-весе коклаште кыл пеҥгыдемеш, ятыр ӱдыр-рвезе дене йолташат лийын шуктенна. Адакшым классыштына дисциплине пеҥгыде, тидыже койыш шоктышым пеҥгыдемда, вий-куатым ешара, – палемдат ӱдыр-влак.