ЕГЭ
1 июньышто Марий Элыште 800 наре выпускник икымше ЕГЭ-м возен – химий, историй да литератур дене. Кундемыште ты кечын экзаменым эртарыме 18 пункт пашам ыштен.
Тений республикыште 2,7 тӱжем наре ӱдыр-рвезе 11-ше классым тунем пытара. Химий дене ЕГЭ-м 411 еҥ ойырен налын, историй дене –284 выпускник, а литератур дене – 129.
2026 ийыште Марий Элыште чылаже ЕГЭ-м эртарыме 23 пунктым ямдылыме. Аудиторийлаште видеонаблюдений системе онлайн пашам ышта. Кажне тыгай пунктышто мер эскерыше-влак лийыт.
ГИА-9
2 июньышто ГИА-9-м эртарыме тӱҥ жап тӱҥалын, экзамен-влак 6 июль марте лийыт.
Математике дене икымше экзаменыш 8016 еҥ регистрацийым эртен. Пашам возаш 3 шагатат 55 минут пуалтын.
Математике дене ОГЭ-ште эн изи первичный баллым, вич баллан системе почеш «кумытан» отметкылан келшен толшым, пеҥгыдемдыме – 8 балл, тудым алгебре да геометрий дене заданий-влакым ыштымылан погат. ОГЭ-ште чумыр экзаменационный пашам шуктымылан тунемшын погымо эн кугу первичный баллже – 31.
Таче, 5 июньышто, ӱдыр-рвезе-шамыч англичан йылме, информатике, историй, литератур, биологий, физике, шочмо йылме дене экзаменым возат.