Кодшо изарнян, 20 августышто, Марий Элым Вуйлатыше Юрий Зайцев «МЭТР» телеканаллан интервьюм пуэн. Тушто ятыр йодышлан вашештен.
Топливе да ялозанлык
Топливе шотышто нелылыкым кораҥдаш «Топливо Марий Эл» порталым ыштыме. Тудын гоч могай заправкыште топливе улмо, черет да ак нерген пален налаш лиеш. Заправкылаште волонтёр-шамыч полышкаленыт.
Тыгак аграрийлан топливым ситараш кӱлын. «Умыленна, кеч-могай жапыште тиде комбайным але тракторым гына огыл, а шурным поген налме тургымымак чарен шогалтен кертеш. А тидыже кочкыш шотышто лӱдыкшыдымылык дене кылдалтын, сандене топливе шапашым ыштен кертме, шурным погымо паша кая», – каласен Юрий Викторович.
Корно да кундемлам тӱзатымаш
2022 ий гыч кызыт марте 1000 утла меҥге корным ачалыме. Идалык мучаш марте эше 260 меҥгым ыштена. Паша чулымын кая. Регионна ты шотышто Российысе вич эн сай кундем коклаш пура, ме нылымше верыште улына. Кундемыштына 90 процент наре машина корно нормативлан келшен толеш.
300 утла общественный территорийым уэдыме, уэш ыштыме. «Еҥ-влакын инициативыштлан полшышо программына уло. Сайынрак илашышт мо кӱлмым палемден, еҥ-влак, программыш ушнен, илыме кундемыштым шке тӱзатат. Кажне ийын тидлан оксам шукырак ойырена», – каласен Марий Элым Вуйлатыше.
ЖКХ дене кылдалтше сомылат шукталтеш. Вӱдпуч-шамычым алмаштат, Волжскышто у коллектор ышталтеш. Физкультур-тазаҥдыме рӱдер, ФАП-влак почылтыт. Кызыт Йошкар-Олаште «Синяя птица» гимназий, 9а да 6-шо микрорайонлаште, Килемар округышто, Волжск олаште школ-влак чоҥалтыт. Вич ийыште
50 школын 52 оралтыжым капитально ачалыме. Тений 16 школ олмыкталтеш.
Тазалык
«Таза республик» проект кундемыштына илышыш шыҥдаралтеш. Кундемна мучко «Тазалык пункт-влак» пашам ыштат. 2022 ий годсек 60 тӱжем утла еҥ тушко миен эҥертен. Кызыт «Онкопатруль» да «Кардиопатруль» программе-влак шукталтыт. Айдеме поликлиникыш але тыгай пунктыш мия, анкетым воза, тудын почеш врач тазалыкше нерген иктешлымашым ышта да приёмыш ӱжеш. Онкологий кундемыштынат, элыштынат колымашке шуктышо чер коклаште кумшо верыште кая. А икымше верыште – шӱм-вӱргорно черлан кӧра колымаш. Садлан нине программе-влак кӱлешан улыт.
СВО участник-влаклан полыш
СВО участник-влаклан да нунын ешыштлан ятыр полыш пуалтеш. Передовойыш 70 утла груз гуманитарный полышым колтымо.
Догазификаций (газпучым участке марте шупшмо) шотышто элыште ончылно каена. СВО ветеран-влаклан да нунын ешыштлан газым участке границе гыч пӧрт марте пурташ 100 тӱжем теҥгем пуат.
«СВО гыч пӧртылшӧ-влаклан паша веран лияш полшена. Рвезе-влак «Герои Марий Эл» программе почеш тунемыныт. Умбакыжат нунын дене кылым кучаш, паша верым темлаш тӱҥалына. Бизнес, предприятий-влак дене пашам ыштена, ветеран-влакым пашаш налышт, туныктышт манын, компенсацийым пуэна. «Социальный контракт» почеш шке пашам почын кертыт», – каласен Юрий Викторович.
Кугыжаныш салтак-влакын пелашышт, йочашт-влакланат полша. «Кичиер» санаторийыште салтак-влакын ача-аваштлан, ватыштлан канаш йӧн уло, 1200 утла еҥ канен, эмлалтын.
«Марий кеҥеж»
Тыгай фестивальым эртараш тӱҥалмылан тений – вич ий. Артистна-влак Йошкар-Олаште веле огыл, район ден округлаштат концертым ончыктат.
Сайлымаш
Марий Эл еҥ-влаклан дистанционный электрон йӱклымашке (ДЭГ) ушнаш йӧным пуышо регион-влак коклашке пурен. Тидлан Госуслуги порталыште 14 сентябрь марте йодмашым пуэн шуктыман. «Йӱкна деч элнанат, республикнанат ончыкылыкышт шога. Депутат парламентыште субъектым ончыктышо еҥ гына огыл, тудо шке кундемжылан полшышаш, республикна вияҥже да федеральный программе-влаклан эҥертен кертше манын тыршышаш», – палемден Марий Элым Вуйлатыше.
Тыгак ешарен: кундемыштына шуко паша ышталтеш, эше шуко ыштыман. План ятыр, чылажат кундемнам тӱзатыме дене кылдалтын.