Марий Элыште кызыт шошо ага мучашлалтеш.
Республикысе «Семёновский», «Шойбулакский», моло кугурак ялозанлыклаште икияш культурым ӱден пытареныт. Вес район ден округласе озанлык-влакат пашам мучашлат. Игечылан кӧра икияшым ӱдымӧ жап изиш кучалтын, вет пасулаште ночко лийын.
Марий Элым Вуйлатыше Юрий Зайцевын увертарымыж почеш, май тӱҥалтыште уда игече шоген гынат, ялозанлык-влак, нелылыкым сеҥен, планысе показатель-влакым шуктеныт.
Икияш кушкылым 127 тӱжем гектарыште ӱдымӧ, пырчан да отызан кушкылым – 82 тӱжем гектарыште. Пареҥге 2,4 тӱжем га кумдыкым авалта, моло пакчасаска – 1,8 га, ӱян кушкыл – 9,8 га.
Шошо агам эртарен колташ агропромышленный комплекслан пуымо кугыжаныш полыш полшен. Ялозанлыкысе тӱҥ направленийлам вияҥдаш 426 млн теҥгем колтымо, тидыже идалыкысе лимитын 42 процентше лиеш. Ты окса дене шӧрым лӱштымӧ, шылым, урлыкашым ыштен налме, кочкышым перерабатыватлыме сомылым шуктымо, изи бизнеслан полшымо.
– Ялозанлык – республикысе экономикынан ик эн тӱҥ отрасльже. Кугыжаныш полыш – регионын кочкыш лӱдыкшыдымылыкшӧ шотышто надырна да тыште илыше-влакын улан илышышт, – палемден Юрий Зайцев.