1 июльышто Боевой действий ветеран-влакын кечышт палемдалтеш. Россий верч кредалше, Шочмо элнан интересше верч шогышо-шамычын кечышт.
Тудым Шернур район Шым Памаш ялын шочшыжо Павел Паймаковат палемда. Марий пӧръеҥ специальный военный операцийыш 2024 ийыште шке кумылын каен.
П.Паймаков профессийже дене – физкультурым туныктышо. Ончыч Мустай ялысе, вара Шернур посёлкысо Н.А.Заболоцкий лӱмеш 2-шо №-ан школлаште пашам ыштен.
– Специальный военный операций тӱҥалмеке, родо-тукымем, йолташем-влак кокла гыч шукын тушко каеныт. 2024 ийыште мыят контрактым подписатленам да Шочмо элнам аралыше-шамыч радамыш шогалынам – вес семын лийынат кертын огыл, – палдара пӧръеҥ.
Тушто лийме жапыште П.Паймаков ныл гана сусырген, госпитальыште кужун эмлалташыже логалын, реабилитацийым эртен. 2025 ий мучаште контрактше мучашлалтын. Кызыт тудо Шернур посёлкышто ила да пашам ышта.
– Тушко кайымылан нимынярат ом ӧкынӧ. Конешне, чылажымат шке шинча дене ужмо кӧргыштет кышам кода, илыш умылымашым вашталта. Пеҥгыдырак лийынам, шойыштмым ом чыте. Илаш-колаш шогымо годым илышын акшым умылет, тыланет чынжымак мо кӱлешым ойыраш тунемат, – ойла ветеран.
П.Паймаковын альбомжо гыч налме фото.