Марий Эл Республикысе Кугыжаныш Погын Председательын алмаштышыже, спецоперацийын ветеранже, «Герои Марий Эл. Талешке-влак» кадровый программын участникше Александр Смирнов 2022 ийыште специальный военный операцийыш каен. А кызыт тудо шкенжым мер пашаште шуара, туге гынат спецопераций шотышто йодыш-влакым ӧрдыжкӧ коден огыл. Шукерте огыл Александр Алексеевич дене кызыт шуктымо сомылжо, моло нергенат вашлийын мутланышна.
«Илыш умылымашем вестӱрлемын»
А.Смирнов Советский район Вечын селаште ешыж дене ила. Паша кечыже кузе эртыме нерген йодмеке, тудо тыгерак вашештыш:
– Тӱрлӧ семын лиеш. Кугыжаныш Погынышто шочмын арняш планым рашемдена да тудын почеш сомылым шуктена. Южо кечын округыш лектына. Но еҥ-влакын йодмашышт шотышто пашам кажне кечын ыштена. Мутлан, республикысе иктаж районыш лектын коштмо годым йодмаш-влак пурат, нуным ончыде огына кодо.
А.Смирнов 2022 ийыште мобилизоватлалтын да специальный военный операцийыште 2024 ий марте лийын.
– Тылеч вара илышем чотшак вашталтын манын ом керт. СВО дене кылдалтше йодыш-влакымат ӧрдыжкӧ шӱкалын омыл. Тушто лийме деч вара илыш умылымашем вестӱрлемын. Кажне еҥ пала – Шочмо элым аралыман, шке пашам кӱлынак шуктыман, лишыл еҥ-влак дене пырля эртарыме жапым аклыман. Мыйынат – тыгак, но, чылажымат шке шинча дене ужын толмеке, тиде умылымаш икмыняр пачаш пеҥгыдемын, вияҥын, – умылтара пӧръеҥ.
«Талешке-влак» радамыште
«Герои Марий Эл. Талешке-влак» программе нерген Александр Смирнов СМИ гыч пален налын. Тӱҥжӧ – программыш ушнышо моло пӧръеҥ-шамыч дене палыме лийынам, шуко ум шкаланем налынам манын палемда тудо программыш ушнымыж нерген.
– Образований дене педагог улам, кугыжаныш муниципальный управлений аланыште шинчымашем уке, а ты программыште лач тидлан кугу тӱткыш ойыралтеш. Мыланна чылажымат уто мут деч посна кӱчыкын да раш умылтарат, – палдара программын участникше.
Тылеч посна Александр Алексеевич Москошто эртаралтше эше ик туныктымо программыш ушнен. «Лидеры России. Политика» конкурсыш 17 тӱжем наре йодмашым пуэныт. Нунын кокла гыч полуфиналыш 300 еҥым гына ойырен налыныт. Финалыш лекше 105 участник радамыш А.Смирноват логалын да тиде тунеммаште шуаралтын.
«Калык юрист»
Тыгай лӱман проектше дене Александр Алексеевич кугешна да, пашаже шыгыр гынат, тудлан жапым ойырашак тырша. Юрист-влак дене пырля Марий Элысе районлаш лектын да калык дене вашлийын, приёмым эртарат.
Эше Кугыжаныш Погын депутат улмыж годым Александр Алексеевич дек юридический йодыш дене шукын толыныт. А тудын юрист-йолташыже-шамыч улыт. Тунам, вашлиймаш-влакым организоватлен, нунын деч полышым йодын. Тыге 2017 ий гыч тылзылан ик гана районлаш лектын кошташ тӱҥалыныт. Тидлан вий да шийвундо кӱлыныт. Грант оксам налаш проектым возеныт, коммерческий огыл организаций семын регистрацийым эртеныт. Грантым сеҥеныт.
– Тиде сомылын кӱлешлыкшым умылена, садлан проектнам кызытат огына кудалте. Калыкым ончылгоч шижтарен, яллаш лектына – олаште, райрӱдыштӧ еҥ-влакым вучен огына шинче. Пого, мланде участке шотышто документ, льготым налме але правашт нерген еҥ-влаклан палдарена. Кызыт СВО участник-влакын да ешыштлан полыш нерген йодыш-влак ятырак пурат, – палдара А.Смирнов.
«Ыштыме сомыл келша гын, нойымым от шиж»
Кузе чыла шукташ манын йодмылан Александр Алексеевич, уто мутым ойлыде, налаш да ышташ манын палемдыш да ешарыш:
– Южо ситуацийым вашталташ ок лий. Молан мыланем тидыже кӱлеш манын шонкалаш тӱҥалат гын, сай лектышыш от шу. Еш дене жапым эртараш гына огыл, пеленышт да пырля лияш тыршем: яндар южыш лекташ, шукырак кутыраш, модаш.
Илышыште мо тӱҥжым ойырен налын моштыман. Искусствыштат тыгакыс: кугу кӱ гыч скульптурым ышташ чыла мо оккӱлым налын кораҥдыман, – манеш ача да пелаш. «Внутренний критик» манме сайынак пашам ышта. Вет чылаж годым огыл шонымо семын лектеш. Южгунам, иктаж сомылым ыштымеке, шке семынет шонет: сайынракат ыштен кертам ыле. Адакшым ыштыме сомыл келша гын, нойымым пешыже от шиж. А паша деч вуйым кандараш пӱртӱсыш лектам. Походыш кошташ тӱҥалаш шонымаш уло – республикнан тӱрлӧ эҥерыштыже сплав дене волаш. Кызыт йоча-влак але изирак улыт, садлан тидым ышташ йӧн уке. Кушкын шуытат, ик-кок-кум кечылан пӱртӱсыш лекташ тӱҥалына.
Поро кумылан, кеч-куштат сайым муаш тыршыше, полыш кидым шуялташ ямде улшо. Тыге манаш лиеш Александр Смирнов нерген. Тудо, нимом ончыде, сай лектышыш шуаш ок тӧчӧ, а шот дене, кӱлынак пашажым ышта. Да тыгодым чылалан йӧраш ок тырше – чонжым колыштын, шке сомылжым ворандара.
Еш альбом гыч налме фото.