Тений шошым «Марий йылмым эн сайын туныктышо – 2026» республикысе профмастарлык конкурсышто куд педагог мастарлыкшым ончыктен. Волжский округ Пӧтъял кыдалаш школышто марий йылмым да литературым туныктышо Дарья Кузьмина участник-влак коклаште эн самырык лийын.
Мастарлык коваж деч куснен
Дарья Пӧтъял школышто шочмо йылме ден литературым кумшо ий туныкта.
– Мый марий шӱлышан ӱдыр кушкынам. Йылмына эн ямле да мотор, шонем. Школыштат шочмо йылмым уло кумылын тунемынам. Адакшым ковам Мария Николаевна Константинова тӱҥалтыш класслам туныктышо лийын. Садлан, очыни, педагог корным ойыренам, – манеш Дарья Олеговна.
Конкурс опытым ешарен
Д.Кузьмина Пӧтъял кыдалаш школын директоржо Анфисия Арсентьевна Андрееван темлымыж почеш «Марий йылмым эн сайын туныктышо» конкурсыш ушнен. Дарья каласкала:
– Районысо тыгаяк конкурсышто сеҥымеке, шке виемлан, моштымемлан ӱшан лектын. Республикысе конкурсышто паша опытем дене палдаренам. Урокышто тӱрлӧ модышым йоча-влаклан эртарем, шочмо йылмым тунемаш кумылаҥдем. Мемнан школышто 150 наре тунемше уло. Марий йылме ден литературым кыртмен тунемыт, нине предмет-влак келшат манын шонем. Кызытсе саман дене тӧр кайыман, занятийлаште тӱрлӧ технологийым кучылт моштыман. Мый Марий тӱвыра рӱдерын войзымо марий мультфильм-влакымат йоча-шамычлан ончыктем. Тиде оҥай, пайдале, шукылан туныктышо ик йӧн.
Дарья Олеговна туныктышо корным ойырымыжлан ок ӧкынӧ. Ты паша тудлан куаным конда.