Вашке Марий кундемысе чодыралаште пожар лӱдыкшыдымылык тургым тӱҥалеш. Тидын шотышто Марий Элым Вуйлатыше Юрий Зайцев чодыра пожарым йӧртымӧ шотышто сводный планым пеҥгыдемден.
Тиде план почеш тыгай туткар годым 2732 еҥ ден 566 единице технике тыршаш тӱҥалыт. Нунылан 6000 наре единице противопожарный оборудований ден инвентарьым ямдылыме.
Планым Марий Эл Республикысе чодыра фондын мландыштыже улшо лесничестве-влакын, «Марий Чодра» национальный паркын да «Кугу Какшан» заповедникын планышт негызеш ыштыме. Тушто улшо увер дене Марий Элыште чодыра пожарым йӧртымӧ годым пайдаланаш, тудын почеш кӱлеш вийым да средствам кучылтмо шотышто пунчалым лукташ палемдыме – чыла тидыже пожар лӱдыкшыдымылык режимым увертарыме жапыште оперативно пашам ышташ полшышаш.
Кызыт пожар лийын кертме тургымлан сайынак ямдылалтыт: лесничествылаште техтунеммаш-влак эртаралтыт, специалист-шамыч калык дене мутланат, пожар ваштареш аншлаг-влакым пижыктылыт, противопожарный инвентарьым, техникым да оборудованийым тергат, тыгак «Экологий» нацпроектын «Сохранение лесов» федеральный проектше почеш налмымат.
2026 ийыште Марий Элысе Пӱртӱс поянлык, экологий да йырым-йырысе средам аралыме министерстве «Единый Россий» партийын калык программыж почеш, «Авиалесоохранын» технический базыжым уэмдаш да комплектоватлаш манын, лишыл жапыште 5 единице чодыра пожар техникым да 50 оборудованийым налшаш. Нуно чодырасе пожар шотышто комплексный мероприятий-влакым эртараш полшат.