Медведево посёлкысо «Витязь» ФОК-ышто школышто тунемше, 2011-2012 ийлаште шочшо ӱдыр-рвезе-влак коклаште волейбол дене «Серебряный мяч» Всероссийский соревнованийын районысо йыжыҥже лийын. Тудо «Волейбол в школу» проект почеш эртаралтын.
Ты проектым школышто тунемше-шамычлан келыштарыме. Тудо 2000 ий годсек Российысе Волейбол федерацийын да Российысе Спорт министерствын полшымышт дене илышыш шыҥдаралтеш. Турнир ӱдыр-рвезе-влак коклаште волейболым шаркалымылан, спорт дене пеҥгыде кылым кучаш шӱмаҥдымылан виктаралтын.
Медведево районысо школ команде-влак волейбол дене модмаште кугу кӱкшытым ончыктеныт. Ӱдыр-шамыч команде-влак коклаште икымше верым Медведево посёлкысо гимназий налын, кокымшо – Медведево посёлкысо 4-ше номеран школ, кумшо – Руэм школ.
Рвезе-шамыч коклаште икымше верым Медведево посёлкысо 2-шо номеран школын командыже сулен, кокымшо вер дене Сурок посёлкысо школ, кумшо вер дене Руэм посёлкысо школ палемдалтыныт. Сеҥыше команде-шамыч вес йыжыҥыште таҥасаш тӱҥалыт.
Медведево районысо физкультур да спорт пӧлкан ВК-се лаштыкше гыч налме фото-влак.