8 сентябрьыште Российысе калык-влакын йылмышт кечым икымше гана палемдыме.
Ты кечын МарГУ-н зданийже воктене Марий грамматикым ыштыше редактор В.Пуцек-Григоровичлан (1762-1782 ийлаште Озаҥыште да Свияжскыште архиепископ лийын) шарнымаш оҥам почыныт.
Марий грамматике марий йылмым, возыктышым вияҥдымаште кугу верым налеш. А шарнымаш оҥам МарГУ-н Национальный тӱвыра да тӱвыра кокласе коммуникаций институтын зданийже воктене вераҥдыме. Тыштак 2023 ийыште «Марий тиште/ Марийские буквы» арт-объектым келыштарыме. Нине буква-шамыч марий йылмым пойдарат да ойыртемжым ончыктат.
Объект-влакым кӱлешан событийлан да марий йылме дене кылдалтше уста еҥ лӱмеш почмо. В.Пуцек-Григоровичын вуйлатымыж почеш Озаҥ семинарийыште Юл кундемысе калык-влакын йылмышт дене Екатерина II императрицын толын кайымыж нерген почеламутлам возымо. Лач тудын пашаже 1775 ийыште марий возыктышлан вияҥаш да марий шомакым научно шымлаш тӱҥалтышым пыштен. Арт-объект-влакым МарГУ Марий Эл Правительстве полшымо дене почын.
Тыгак ты кечын «Гастрономический код Марийского края» книган презентацийже лийын. Тушко Марий Эл Кугыжаныш Погынын Председательже М.Васютин миен коштын да книгам кӱкшын аклен. Чыла тидыже Депутатын кечыже мероприятий кышкарыште эртаралтын.