Тиде вич ий наре ончыч лийын. Тунам Таня йолташ ӱдырем Миша дене келшен. 19 июльышто Танян шочмо кечыже ыле. Тылеч ончыч нуно Миша дене чот сыреныт. Таня шортын, таҥже туддек толын гынат, ужмыжо шуын огыл.
18 июльышто Миша мый декем йыҥгыртен да полшаш йодын – Танялан шергашым ойырен налаш кӱлын. «Мыйым ужмыжо ок шу гын, кеч шарнен илашыже шергаш кодеш», – ойлен рвезе йыҥгыртымыж годым. Тыге ойлымыж деч лӱдынамат ыле, шкеж дене ынде иктаж-мом ыштынеже огыл дыр манын шоненам да ты ошкыл деч чараш, лыпландараш тӱҥалынам. Но Миша, мыйын тургыжланымем шижын, ит ойгыро, шочмо кечыжлан пӧлекым ыштынем манын.
Миша мотоцикл дене кудалыштын, мый декемат йӧратыме транспортшо дене толын. Мый тушко шым шич, садлан йолын ошкылна. Ужар кӱан ший шергашым нална да эрлашыжым Танян шочмо кечыштыже вашлияш кутырен келшышна. Но Миша пайремыш толын шуын огыл – кечывал тураште мотоциклже дене корно туткарыш логалын да верыштыжак колен. Тидын нерген Танялан таҥжын аваже йыҥгыртен ойлен. А тудо кечынак кас велеш Танялан коваже йыҥгыртен. «Миша дене сырен улыда мо? Шукерте огыл толын кайыш, тыланет шергашым пуаш кӱштыш. Чайым йӱаш пуртынем ыле, но, мыйым вучат манын, писын гына кайыш», – каласен коваже.
Саде шергашым Таня кызытат чия. Кажне ийын 19 июльышто Миша дек шӱгарлаш миен толеш.
ЕЛЕНА.
Морко район.