22 июньышто Ойганен шарныме кече палемдалтын. Морко районысо Шӱргыял школ ден Кораксола тӱвыра пӧртат Кугу Ачамланде сарыште шке вуйыштым пыштыше салтак-влак лӱмеш обелиск ончылан ты кечын сортам чӱктеныт. Тиде мероприятийыш мыят шӱжарем дене коктын ушненна.
Ял покшелне чыла кумылан еҥ-влак чумыргышна да обелиск ончыко кайышна. Чыла тидлан мыйын туныктышем Елена Валериановна Григорьева вуйын шоген. Обелиск ончыко миен шумеке, «Муро кумыл» ансамбльын участникше-влак (Валентина Георгиевна ден Антонида Александровна) мутым нальыч. Валентина Георгиевна чумыр салтак-влак нерген икмыняр шомакым ойлыш да шке Алексей эргыже нергенат ятыр мутым каласыш. Антонида Александровна СВО-што вуйым пыштыше Андрей эргыж нерген шарналтыш да кумылжо тодылто. Андрейын Артур шольыжат икмыняр шомакым каласыш, тыге Андрейын да Алексейын ешыже обелиск ончылан пеледышым пыштышт.
Варажым мыят шке серыме «Тыныс верч» почеламутем лудын пуышым.
Ме шке геройна-влак дене кугешнен илена, нуным шарнена.
Надежда Сергеева, Морко район Шӱргыял школын тунемшыже.
Авторын колтымо фото-влак.