Шке пашам почаш, паша верым муаш, озанлыкым кучаш але неле илыш ситуаций гыч лекташ шонышо-шамыч Марий Элысе Паша да калыкым социально аралыме министерстве дене соцконтрактым ыштен кертыт.
Индивидуальный предприниматель пашам шукташ социальный контрактым Курыкмарий районышто илыше Ангелина Соловьёват ыштен. Ойырымо оксам тудо авторский вургемым ямдылыме брендшым вияҥдаш кучылтын. Шке ательем почмо марте кужу корным эрташ кӱлын, но тыршымаш арам лийын огыл. Кызыт Ангелина ыштыме кажне вургемышкыже чонжым пышта, шке пашаж дене утларак еҥым куандараш шона.
Шке ургаш тӱҥалаш пернен
Ангелина Чувашийысе Канаш олаште шуко шочшан священник ешыште шочын. Вара ешышт Курыкмарий район Когосола селаш илаш куснен, кызытат туштак илат. Ӱдыр ончыч селасе школыш коштын, музыкальный школышто шуаралтын. 9-ше классыш Козьмодемьянск оласе школыш куснен. Тушто тунеммыж годымак Ангелина районысо ик сӱрет конкурсыш ушнен да кумшо верым налын. Такшым ӱдыр изинек сӱретлаш шӱман. Тетрадь поляштыже модель-влакым чӱчкыдын сӱретлен. А школ деч вара тудо Нижний Новгород олаште регентлан (черке хорым вуйлатышылан) тунем лектын.
– Моло ӱдыр-влак деч ойыртемалтше вургемым эре чиенам, ожнысо стильлан келшыше тувыр-влак чонемлан лишыл улыт. Ончыч шкаланем вургемым эре ик ӱдырлан ургыктенам ыле. Но тудо вес вере илаш куснен, тылеч вара шкаланем келшыше, мыйым умылен моштышо мастар еҥым кужу жап кычалынам – муын омыл. Да шкаланем вургемым шке урген онченам. Келшен, да ынде мыят ургызо улам, – каласкала А.Соловьёва.
Тувырым, жилеткым…
Соцконтракт нерген тудо палыме еҥ-влак деч колын. Но ты ошкылым ышташ але уке, шуко шонкален, кокытеланен. Ешыжын, родо-тукымжын полышыштлан, ӱшаныштлан кӧра документым оформитлаш тоштын.
– Окса дене профессиональный ургымо машинкым, куэмым, шӱртым, отпаривательым, лекалом (куэмым шулаш лӱмын арвер), вашкӱзым да молымат наледенам. Такшым брендем оксам кондышо бизнеслан огыл, чоным куандарыше усталык пашалан шотлем. Иктаж вургемым ургаш тӱҥаламат, тудо могай лиеш, эре оҥай. Мастерскоем мӧҥгем пеленак верланен. Интернетыште, мутлан, келшыше образым ужам, ты идейым негыз шотеш налам да шкаланем келшышын вашталтем, мо кӱлешым ешаркалем. Вуйышто эше ятыр шонымаш, туге гынат ямде выкройко ден шаблон-влак дене пайдаланем – шкеже тидым ышташ эше тунем шуын омыл. Но, шижам, ончыкыжым тӱҥалам, вет опыт жап дене погына, – манеш мастар еҥ.
Ангелина утларакшым ӱдыр-ӱдырамаш-влаклан тувырым, сарафаным, жилетке-влакым урга. Пашаштыже хлопок куэмым гына кучылтеш – тудын дене могыр шӱла, адакшым Ангелинан синтетике куэмлан аллергий. Кызыт ургымо тувыржо-влакым Йошкар-Олаште, Чебоксарыште, Владимир, Башкортостанысе Мелеуз олалаште, Угарман кундемысе Дивеево селаште чиен коштыт. Урген пуаш йодмаш-влак эре пурат, утларакшым соцсетьлаште Ангелинан кидпашажым ужыт да тыгайракымак ямдылаш йодын возат. Теве шукерте огыл туддеч плащым урген пуаш йодыныт. Тыгайжым Ангелина эше ик ганат урген ончен огылат, тургыжлана, но ямде плащ могай лектеш, шкежат чон вургыж вуча.
Поро кумылан, весылан полыш кидым шуяш эре ямде, сӱретлаш да ургаш йӧратыше – тыге ойлаш лиеш Ангелина Соловьёва нерген. Ожнысо пагытым йӧратыше да аклыше еҥлан XIX курым тӱҥалтышысе жап нерген роман-влакым лудаш келша.
Вашке Ангелинан соцконтрактше мучашлалтеш. Ик ий ончыч ты кугыжаныш полышлан эҥертымыжлан кызыт йывыртен гына. Вет тыге тудын чон йодмо почеш ыштыме сомылжо вияҥын да брендыш савырнен.