Елена Трофимова тений Параньга кыдалаш школын 11-ше классшым «визытан» ден «нылытан» отметкылан тунем пытарен.
Ӱдыр школыштат, мер пашаштат ойыртемалтеш. Тудым куд ияш улмыж годым ачаж ден аваже районысо тӱвыра пӧрт пеленысе «Радуга» куштышо коллективыш коштыкташ тӱҥалыныт. Ты ансамбль регион-влак кокласе, республикысе да районысо конкурслаште участвоватлен, ончыл верым наледен.
Елена активист улмыжым Якимов, Герасимов да Колумб лудмашлаште пеҥгыдемден. Олимпиадыштат кажне ийын шинчымашыжым терген. Параньга районышто ОБЖ, технологий да марий йылме дене призёр лийын.
Марий ӱдыр тӱрлӧ проектыште, республикысе, Российысе конкурслаште грамот, диплом дене палемдалтын. Тудлан «Шочмо кундем: теҥгечысе, тачысе, эрласе» республикысе конкурсышто 1-ше степенян дипломым кучыктеныт. Елена «Шаг в науку» XI регион-влак кокласе конференцийыште «Парабола» шымлыме пашаж дене III степенян лауреат лӱмым сулен, «Волонтёры могут всё!» экологий проект шотышто республикысе конкурсышто – II степенян дипломым.
Тудо Параньга школысо «Легион» юнармейский патриотический клубышто кум ий командир лийын, «Юнармейская доблесть III степени» медаль дене палемдалтын. «Авангард» рӱдерыште эртаралтше сборлаште ончыч участник лийын гын, пытартыш кок ийыште вожатый семын коштеш. Марий самырык тукым слётышкат ныл гана миен. Тений тушто вожатый-организатор семын пашам ыштен.
Марий еш
Елена – марий ача-аван изирак шочшыжо. Кугурак ӱдырышт, Юлия, МарГУ-што врач лияш ямдылалтеш, 5-ше курсышко куснен. Василий эргышт военный академийыште 3-шо ий тунемеш. Авашт Эрвика Лазарьевна Параньга школышто туныктышылан пашам ышта, ӱдыр-влаклан технологий урокым вӱда. Ачашт Николай Александрович водительлан пашам ышта.
Поро корным сугыньлена
Елена единый кугыжаныш экзаменлан историй ден обществознанийым ойырен налын, нунын дене сай шинчымашыжым ончыктен: икымшыштыже 72 баллым, а весыштыже 70 баллым поген.
Школын выпускницыже кызытеш шке документшым кум вузышко колтен. Ончылгоч тидын нерген ом каласкале, мане. Туге гынат ме Еленалан шонымашыжым шукташ поро корным сугыньлена да ятыр сеҥымашыш шуаш, йӧратыме пашам муаш тыланена.