Заседанийыште Молодёжный парламентын Медведево районысо председательже Глеб Леонтьевын паша нерген презентацийжым колыштна. Шуко палыше, ӱшандарышын каласкалыше самырык еҥ эше 10-шо классыште гына тунемеш манын отат шоналте. Глеб уло кумылын мутланаш келшыш.
– Глеб, шке районысо Молодёжный парламентыште кунам да кузе тыршаш тӱҥалынат? Самырык-влак ушнат?
– Кодшо ийын апрельыште икымше погынымаште мыйым председательлан ойырышт. Парламентын пашашкыже ушнаш кӧненам, вет районысо мер илышым эре эскерем да кӱлешан йодышлам решатлашат полшем, шке инициативымат илышыш шыҥдарем.
Кызыт мемнан деке шукын ушнат. 30 еҥан штабым ыштенна, тушто чолгалык шижалтеш. Тылеч проектла дене пашашке, мероприятий ден акцийлашке 50 утла участник толеш.
– А тений могай сомылым ворандаренда?
– Ме тӱрлӧ сынан мероприятийым эртарена: официальный заседаний, шкенан проект, вашлиймаш-влак. Российысе проектышкат ушнена, нунын коклаште «ГосСтарт», «Уроки Второй мировой», «Свеча памяти» да молат улыт. Тыгак командына дене Единый действий кечылан, Молодёжь кечылан акцийым ямдыленна да районысо кугу мероприятийламат авалтенна.
Тений тӱткышым кок тӱҥ корнылан ойыраш палемденна. Эн ончычак мемнам школ ден тунемме организаций-влакын, тыгак тунемше-влакын самоуправленийжын единый системыже укелык тургыжландара. Кажне тунемме тӧнеж посна пашам ышта – тидыже районысо молодёжьын вий-куатшым тӱрыснек кучылташ ок пу. Сандене ме школ-влак коклаште кылым ыштыме, опыт дене пайлалтме да инициативым пырля шуктымо сомылым тӱҥалынна.
Кокымшо нелылык – ялысе да пашам ыштыше молодёжь дене лушкыдо кыл. Сандене ты категорийын йодмашыжым умылен налаш вашмутланымаш йӧным кучылтына.
Кызыт молодёжьлан тугай сомыл келша, кудыжо шинчалан койшо лектышым пуа да оҥай улмыж дене ойыртемалтеш. Самырык-влак таче мероприятийым организоватлат, проект-влак почеш пашам ыштат, чолга активист-шамычлан полшат.
– Глеб, а могай лектышыш шуында?
– Эн ончычак уверым намиен шуктымо каналым ыштенна: молодёжь событийла нерген кӱлеш уверым Молодёжный парламентын соцкылысе лаштыклаж гыч пален налеш. Ты сомылым уэмден-вияҥден шогена.
Тыгак мероприятий ден участник-влакат ешаралтыт. Чолга еҥ-влаклан инициативыштым проект марте шукташ полшена, шкенан темлымашна ден йодмашнам тыгак мучаш марте наҥгаена.
– А лишыл жапыште мом эртареда, кушто?
– Вашке Медведево районысо Молодёжный парлментын 6-шо заседанийже лиеш. Тудо администрацийын актовый залыштыже эртышаш да Россий калык-влакын икоян улмо идалыклан пӧлеклалтеш.
Заседанийыш районысо молодёжный организаций, тыгак туныктымо тӧнежла гыч еҥ-влак толшаш улыт. Тиде икымше кумда мероприятий, сандене тудлан кӱлынак ямдылалтына. Программым ыштенна, тудо мыланна кӱлешан йодышлам авалташ гына огыл, а районысо пашам посна направленийла дене виктарышаш.
Мыланем теве мо келша: пытартыш жапыште самырык тукымын шонымашыжым утларак колыштыт, тӱрлӧ пайдале йодышым каҥашымашке ӱжыт, мемнан позицийна дене келшат. Сандене кодшо ийысе пашаштына тидым ик эн кугу лектышлан да ончыко каяш полшышо мотивацийлан шотлем.