22 сентябрьыште Йошкар-Оласе Самырык-влак полатыште «Юнармий» толкынын регионысо отделенийжын Х слётшо эртаралтын.
205 отряд, 7 тӱжем наре еҥ
Лач 10 ий ончыч, 2016 ийыште, Россий Обороно министерствын темлымыже да элнан Президентше В.Путинын полшымыж дене Российыште Юнармий толкын ышталтын. Тудын тӱҥ цельже – самырык тукымым тӱрлӧ могырым шуараш, элнан чын гражданинжым кушташ, патриотизмым вияҥдаш, шке элын историйжым палаш тараташ, Шочмо элым, тудын тӱвыра ден йӱлажым аралышым кушташ.
Марий Элыште Юнармийын отделенийжым 10 ий ончыч 1 июльышто почыныт. Верысе штаб-влак республикысе 17 муниципал образованийыште пашам ыштат. 10 ий жапыште ты толкыныш 14 тӱжем наре самырык еҥ ушнен. Кызыт республикыштына 205 отрядыште 7 тӱжем наре ӱдыр-рвезе шотлалтеш. Толкыныш ушнышо-влакын чотышт дене Марий Эл Юл кундем федеральный округышто – 5-ше верыште.
Юнармеец-влак тӱрлӧ аланыште чолгалыкым ончыктат: военно-прикладной дисциплине-влакым шымлат, Патырлык урок-влакым ямдылат, тоштерлаште экскурсий-влакым, тыгак ветеран-шамыч дене вашлиймаш-шамычым ямдылат, шарнаш кӱлмӧ вер-влакым эскерен шогат. Марий Эл гыч юнармеец-шамыч Российысе да республикысе мероприятийлаш чолган ушнат. «Зарница 2.0.» военно-патриотический проектыште, мутлан, кызытсе дисциплине-влакым шымлат: огневой ден строевой подготовкым, спорт ямдылалтмашым, тактический медициным, беспилотный аппарат дене пашам ыштымым да нунын деч аралалтмым, военный журналистикым. Тыге ӱдыр-рвезе-влак командыште пашам ышташ тунемыт, ответственный лийыт. «Гвардеец» Юл кундем округысо юнармеец-влаклан военно-патриотический сбор-влак пасу условийыште шкем тергаш да таҥасымаште ончылно лияш, икте-весе дене кылым ыштен сеҥышыш лекташ туныктат. Юнармеец-влак тыгак «Пост №1» гражданско-патриотический акцийыш ушнат – курымашлык тул, совет салтак-шамычлан мемориал воктене вахтыште шогат. 2025 ийыште Марий Элыште «Юнкор 12» школым икымше гана эртареныт, тушко Юнармий толкынын районласе штабше-влак ушненыт. Чылаже регионысо да верысе штаблаште идалык мучко 100 наре мероприятийым эртарат.
А кызыт Юнармий толкын вияҥеш веле огыл, тудо утларак профессиональный лиеш да республикысе кажне подросткылан шке омсажым почеш. Тидлан «Авангард» самырык-влакым военно-патриотический шӱлышеш куштымо рӱдерат йӧным ышта – кажне ийын 2000 наре юнармеецым вашлиеш.
Юнармий – тиде вий-куат, сеҥымашке шуаш тыршымаш, эн кугу идей-влакым илышыш шыҥдарымаш. Юнармий толкынын 10 ий пашам ыштыме жапыштыже ик тукымын кушмо историйже возалтын. А ончылно – у тергымаш ден сеҥымаш-влак, у лаштык – ты толкыныш шукерте огыл ушнышо ӱдыр-рвезе-шамыч шке историйыштым серат.
1500 наре юнармеец Россий Обороно министерствын, МВД-н, ФСБ-н, МЧС-ын, Росгвардийын тунемме тӧнежлаштыже шуаралтыт.
2018 ий гыч Юнармий толкынын регионысо штабше Россий Герой, гвардий подполковник, Йошкар-Олаште шочшо М.Н.Евтюхинын лӱмжым нумалеш.
Слётыш толшо-влаклан кугу интерактивный выставкым ямдыленыт: школьник-влак специализированный машина, бронетехнике да авиационный технике, саргурал, криминалистике ден специальный аппаратурым ончен веле огыл, кучен ончен кертыныт.
Ойыртемалтшылан – награде
Юнармий толкынын активистше-влаклан тунеммаште да спортышто, военно-патриотический мероприятийлаште кӱкшытыш шумылан 2018 ий гыч наградым – «Юнармейская доблесть» медальым – кучыктат. Марий Элыште чылаже 277 юнармеец ты медальым сулен. Теният слёт годым икмыняр чолга еҥым палемденыт. Нунын коклаште – Екатерина Фролова.
Катя Йошкар-Оласе 14-ше №-ан гимназийын юнармий классыштыже шуаралтын. Кызыт Столичный бизнес-колледжыште 1-ше курсышто «Правоохранительная деятельность» специальностьлан тунемеш.
– 8-ше класс гыч Юнармий классыште тунемынам. А кызыт Марий Машиностроительный заводын «Антей» отрядыштыже шотлалтам. Коча-ковам-влакын подвигыштым шарнен да нунын дене кугешнен, ты толкыныш ушненам. Адакшым кызыт ачам Сергей Николаевич Шочмо элна ончылно порысшым шукта – специальный военнный операцийыште лӱддымылыкшым ончыкта. Тудат мыланем – пример.
Гимназийыште тунеммем годым ятыр мероприятийыш чолган ушненам. Эн чот Сеҥымаш парадлаште: Самара олаште да Йошкар-Олаште – лиймем шарналт кодын. Чот ямдылалтынна. Вес ийынат парадыште маршироватлаш кумылем уло, – манеш Е.Фролова.