Чодыраште коштмаш кеч-кӧланат эн ончыч ласкалыкым пуртышаш, а кычалме да утарыме сомылыш савырнышаш огыл. Садлан тушко тарваныме деч ончыч икмыняр минутым сайын ямдылалтмылан ойырыман. Тыге ыштен, шкендам йӧндымӧ ситуаций деч арален сеҥеда.
Ончылгоч ямдылалт
Россий МЧС чодыраш тарваныме деч ончыч теве мом шотыш налаш темла:
лишыл еҥ-влаклан кушко, могай чодыраш кайыме да кунам пӧртылаш шонымо нерген каласыман,
могай корно дене кайымым ончылгоч палемдашыман, да тудо йолгорно гыч кораҥман огыл,
чевер тӱсан, тораш волгалтше вургемым чийыман,
пелен вӱдым, кочкышым, фонарикым, шӱшпыкым, компасым але навигаторым налман,
телефонын аккумуляторжым 100 процент марте зарядитлыман, йӧн уло гын, пелен внешний аккумуляторым пыштыман,
палыдыме вершӧрыш шкет кайыман огыл.
Йомынат гын – ит ӧрткӧ. Вес вере ит кай, 112 номеран телефон дене йыҥгырте да утарыше-влак мом ойлат – тудым ыште.
Шарне! Лӱдыкшыдымылык эн ончыч тый дечет тӱҥалеш!