27 сентябрьыште Йошкар-Оласе Марий паркыште Угинде пайрем пеш ямле лие.
Тудым ожнысо семынак Марий тӱвыра рӱдерын пашаеҥже-влак эртареныт. Районла гычат ансамбль-влак Угиндылан ямдылалт толыныт. У шурно гыч мом гына кӱэштын огытыл?! А сӧрал номерышт дене калык ончыко лектын выступатлымыштым калык куанен вашлийын.
Шкешотан конкурс
Угинде пайремыште кажне ийын киндым, моло кочкышымат кӱэшт толмо шотышто шкешотан таҥасымаш эртаралтеш. Ты гана икымше вер дене Оршанке районысо Кугунур тӱвыра пӧртын «Какшан сем» фольклор ансамбльже ден Шернур районысо Чылдемыр тӱвыра пӧртын «Олык марий» ансамбльышт ойыртемалтыныт.
– Ме, у шурным поген налын, у киндым кӱэштын конденна. Тыгак Угинде пайремлан келшыше такмак дене сценышке лектынна. Мемнан кундемысе «Земледелец» озанлыкыште шурным ончен куштат. «Олык марий» ансамбльышкынат тушто ондак тыршыше-влакат коштыт, киндын ӱстембаке толмо корныжым сайын палат. Самырык-влакат йӱдшӧ-кечыже полшат, комбайнын пасушто «ийын» коштмыжым ужына. Такшым коллективнан историйже поян, тудо ынде 69-ше ий калыклан мурен куштымашым ончыкта.
Кодшо ийын ты пайремыш икымше гана толынна ыле. Пеш келшен. Сандене ты ганат, эрдене эрак кынелын, шешкынам памашыш вӱдлан колтен, яндар памаш вӱд дене руашым нӧштылынна. Кӧ когыльым, кӧ киндым, кӧ перемечым кӱэштынна, – каласкалыш Чылдемыр тӱвыра пӧртын художественный вуйлатышыже Снежана Глазырина.
Угинде пайремыште кокымшо верым У Торъял тӱвыра пӧртын «Торъял кундем» фольклор ансамбльжылан пуымо. А кумшо вер дене Тошто Торъял тӱвыра пӧртын «Ший оҥгыр» калык фольклор ансамбльже палемдалтын.