Татарстан Республик Мамадыш район Черкасс ял гыч Юлия Сергеева Курыкъял школышто 8-ше классыште тунемеш. Изинек марла мураш йӧрата, тӱҥалтыш класслаште тунеммыж годым марий койышыжым тӱрлӧ мероприятийыште ончыктен. Мутлан, 3-шо классыште Юлия Рушарня шкоын да этнокультурный компонентан школын республикысе слётыштышт лийын. Мероприятий шочмо йылмын тӱнямбал кечыжлан пӧлеклалтын ыле.
Юлия шуко шочшан ешыште кушкеш. Тудо каласкала:
– Ешыште вич йоча улына. Мый – эн изиже. Авам мӧҥгыштӧ шинча, озанлыкым куча. Ачам – плотник. Моло еш семынак пашам ыштен, икте-весым пагален да полшен илена. Пайремыштат канен моштена. Ешыштына ик пайремат марий национальный кочкыш: команмелна да подкогыльо – деч посна ок эрте.
Ю.Сергеева Курыкъялысе тӱвыра пӧрт пеленысе «Олык сем» мурышо да куштышо ансамбльыш коштеш.
– Коллективна изижак огыл – кандаш еҥ улына. Районыштына ансамбльнам палат. Ӱмаште «Семык» фестивальыште лийынна. Тунам мый эше «Марий чевер ӱдыр» конкурсышто участвоватленам. Марий койышемым, мастарлыкемым, шочмо йылмын моторлыкшым ончыктенам. Тушто кумшо верым налынам, – ойла ӱдыр.
Юлиям выпускной класс вуча. Ончыкшым могай профессийым ойыраш, кокытелана. Тудлан полицейский ден кондитер паша-влак келшат. Идалык жапыште шонымаш эше вашталт кертеш. Тӱҥжӧ – чонлан келшыше корным ойырыжо да умбакыжат марий шӱлышан улмыжым арален кодыжо.