Теҥгече, 20 августышто, Йошкар-Олаште Г.Константинов лӱмеш Академический руш драмтеатрыште образований пашаеҥ-влакын Августовский конференцийышт эртен. Мероприятий «Республика Марий Эл: Образование для созидания. Единство для будущего» образовательный форумлан тӱҥалтышым ыштен.
Марий Эл Республикым Вуйлатыше Юрий Зайцев конференцийыш ушнен. Торжественный ужаш деч ончыч тудо образований да науко министр Лариса Ревуцкая дене «Созидание и единство: два вектора развития» иммерсивный выставкым ончалыныт. Тушто патриотический воспитанийлан пӧлеклалтше экспозиций-влак лийыныт, тидын шотыштак – «Азбука СВО» стенд.
Республикысе педагог ден тунемше-влак спецоперацийын участникше-влаклан полшымышт дене Сеҥымашым лишемдымашке шке надырыштым пыштат. Школьник-влак ден нунын наставникышт сарзе-влаклан 20 тӱжем утла серышым возеныт, 12 тӱжем утла окоплык сортам, 9 тӱжем компект кукшо душым, тӱжем утла нашлемникым да 950 наре маскироватлалтме сеткым ямдыленыт.
Регионым Вуйлатыше туныктышо-влаклан пашаштлан тауштен: «Ты профессийын престижшым нӧлталаш да пашам ышташ сай условийым ышташ манын, Россий Президент Владимир Путин туныктышо-влаклан ешартыш полышым пуымо шотышто Указым подписатлен. Кумылаҥдыме туныктышо гына йоча-влакым патриотический мероприятийлаш да калыклан пайдам кондышо пашаш ушышо рӱдӧ лийын кертеш».
Марий Элын образований системыжлан 105 ий темме идалыкыште эртаралтше конференций 600 наре еҥым: педагог-шамычым, тунемме тӧнеж-влакын вуйлатышыштым, кучем орган-влакын да общественностьын еҥже-влакым – чумырен. Участник-влак деке видеосаламлымаш дене Россий просвещений министр Сергей Кравцов ушнен. Тудо палемден: шушаш тунемме идалыкыште эн ончычак туныктышо-влакым уто отчёт деч утарыман, нуно сай шинчымашым пуаш тыршышаш улыт.
Марий Эл Правительстве образований системым вияҥдымылан кугу тӱткышым ойыра. Тыге 2036 ий марте Социально-экономический вияҥмаш стратегий илышыш шыҥдаралтеш. 2026 ийыште ты аланлан 16,5 миллиард теҥгем ойырымо, тидыже ӱмашсе деч 1,7 миллиардлан шукырак.
«Молодёжь и дети» нацпроект почеш Йошкар-Олаште кок школ чоҥалтеш. «Синяя птица» гимназийым да Килемар районышто школым вашке ыштен шуктат. Тыгак Волжск олаште школым нӧлташ тӱҥалме. Тӱҥ корнылан «Профессионалитет» федеральный проект шотлалтеш. 2026 ийыште тудо ныл образовательно-производственный кластерым уша. 2027 ийыште визымше кластерым ышташ палемдыме, тудо образованийын экономикын секторжо дене кылым чотрак пеҥгыдемдышаш.
Юрий Зайцев педагог-влаклан кугыжаныш да ведомственный награде-влакым кучыктен.
«Марий Эл Республикысе образованийын сулло пашаеҥже» почётан лӱм дене «Дарование» школ-интернатын тӱҥалтыш класслам туныктышыжо Наталья Любимова ден Кужэҥер район Руш Шой школын физикым туныктышыжо Николай Суворов палемдалтыныт.
Марий Эл Республикын почётан грамотшо дене Советский район Роҥго школышто руш йылме ден литературым туныктышо Ольга Егорова, Йошкар-Оласе 5-ше №-ан «Обыкновенное чудо» школын педагог-психологшо Галина Кислицына, Курыкмарий район Эмӓн школышто ОБЗР предметым туныктышо Сергей Савельев, Волжский округ Шарача школын музыкальный вуйлатышыже Валентина Толстова, тыгак Килемар округ Йӱксар школышто тӱҥалтыш класслам туныктышо Наталия Феофанова суапландаралтыныт.
