20-21 мартыште Йошкар-Олаште «Ритмы и краски Финно-Угрии – 2026» регион-влак кокласе форум эртаралтын. Тушко Самара область, Мордовий, Татарстан, Удмуртий республикла да Моско ола гыч уна-влак толыныт.
Форумым МарГУ-што пайремлын почыныт. Участник-шамычлан «Мой финно-угорский стиль» фотоончерым ямдыленыт. Тематический секций, регион-влакын проектыштын презентацийым эртареныт. Россий калык-влакын икоян улмо идалыкын участник-шамыч калык йӱлан кызытсе илышыш шыҥдаралтмыж нерген ойленыт: калык йӱлам арален кодымо, вургемыште этностиль гыч тӱҥалын цифровой кумдыкышто шочмо йылме марте. Форум годым эксперт-шамыч дене «йыргешке ӱстелат» эртаралтын. Тыгак финн-угор калык-влакын ассоциацийыштын Молодёжный советшын заседанийже лийын. Программыш пуртымо эше ик кугу мероприятий – «Изи гармоньчо» йоча конкурс.
– Тыгай форум-влакым моткоч кӱлешанлан шотлем. Нуно самырык-шамычлан Россий калык-влакын тӱвыра поянлыкышт дене палыме лияш веле огыл, тыгак тудым кызытсе жаплан келыштарен арален кодаш да вияҥдаш полшат, – ойлен Марий Эл Республикысе Молодёжный парламент председательын сомылжым жаплан шуктышо Ю.Петухова.
Марий тӱвыра рӱдерын архивше гыч налме фото.