Тений литератур дене ЕГЭ-м Марий Элыште 120 наре ӱдыр-рвезе кучен. Кок ӱдыр экзаменыште 100 баллым поген кертын. Иктыже – Б.Р.Ахматьянов лӱмеш Параньга кыдалаш школын выпускницыже Лилия Даутова.
– Лилия, саламлем тыгай сай результат дене. Заданий-влак неле ыльыч?
– Йодыш-влак куштылгыжак лийын огытыл. Но мый экзаменлан идалык мучко кыртмен ямдылалтынам. Эн неле мылам пытартыш латикымше заданий лийын. Темлыме вич теме почеш иктыжлан кугу сочиненийым возыман ыле. Тудлан мыйын шагат утла жап каен. Конешне, экзаменым 100 баллан кучен кертам манын шонен омыл. Содыки ик йоҥылышлан шӱдӧ гыч куд баллым кудалтат. Но кертмем семын чыла ыштенам.
– Экзаменым сайын кучаш манын, тӱрлӧ калык пале уло. Тый тудлан ӱшанет?
– Тидын шотышто шуко тӱрлӧ калык палым колынам. Мутлан, йолвундашыш вич теҥгеаш ший оксам пышташ кӱлеш. Але уш гыч налме шинчымаш ынже йом манын, экзамен деч ончыч вуйым мушман огыл. Мый тидлан ом ӱшане. Чот тунемынам, экзаменым кучымо годым кумылемат нӧлтшӧ лийын. Кеч-могай нелылыкым, шке вийлан ӱшаныдымашым сеҥаш лишыл еҥ-влакын полышышт полша.
– Моло предмет-влак дене экзаменым кузе кученат?
– Руш йылмым да обществознанийым ик семынак 94 баллан сдатленам. Базовый математике дене экзаменым визытан отметкылан кученам.
– Школышто йӧратыме урокет могай лийын? А могайым шагалрак йӧратенат?
– Обществознаний предметым илышыште ик эн кӱлешанлан шотлем. Айдеме кеч-могай ийготышто шке права ден обязанностьшо нерген палышаш, шонем.
Физике мылам нелыла чучын. Ты предметым умылаш да йӧраташ чот тыршенам гынат, кертын омыл. Такшым ты предмет дене урок эре оҥайын эртен.
– Яра жапетым кузе эртарет?
– Книгам лудам. Тӱрлӧ кидпашалан кумылан улам, мутлан, тӱрлаш йӧратем. Лишыл еҥем-влак дене жапым утларак эртараш тыршем.
– Могай университетыш тунемаш пураш шонет? Келшыше факультетым можыч ойыренат?
– Шымше классыштак шкемым филологий аланыште ужынам. Озаҥ оласе федеральный университетыш Филологий да тӱвыра кокласе коммуникаций институтыш тунемаш пураш шонем.
Лилия – йодыш-влаклан раш, уто вӱд деч посна вашештыше ӱдыр. Тудо шке шонымашкыже шуаш манын, уш-акылжым кажне кечын пойдара, тыгодым родо-тукым, йолташ кыл нерген ок мондо.