Ты арнян Йошкар-Олаште икымше фиджитал-рӱдерым почмо.
У тукымлан келшен толшо, классический ден спортын цифровой видшым да виртуальный реальность технологийым ушен шогышо спорткомплексым «Бизнес-спринт (Я выбираю спорт)» федеральный проект почеш чоҥымо.
Пайремле мероприятийыште Марий Элым Вуйлатыше Юрий Зайцев ты шонымаш Россий Правительстве Председательын алмаштышыже Дмитрий Чернышенко толмо годым шочын манын ушештарен. Тыгак тудо тиде ойыртемалтше спортивно-интеллектуальный кластер йоча ден самырык-влаклан спорт шотышто мастарлыкыштым ончыкташ сай вер лиеш манын ӱшан дене ойлен.
Ты объектысе оборудований-влакым Фиджитал-спортын всероссийский федерацийын директоржо Мансур Зарипов кӱкшын аклен.
– Элыштына инновациян спортивный дисциплине-влак вияҥ толыт. Марий Элыштат фиджитал-спорт лиймылан куанем. Регионым Вуйлатышылан тиде проектлан ӱшанымыжлан поснак кугу таум каласем, – каласен М.Зарипов.
У рӱдер Ий полат ден Спортын вӱд видше-влак полат коклаште верланен. Сооружений-влакын воктенак улмышт тӱрлӧ спорт дене заниматлаш йӧным пуа. Тиде рӱдерыште 40х20 метр кумдыкан вирутальный футбол пасу, стритболлан площадке, воркаут ден диджитал зоно-влак, 20 модмо веран компьютерный зал, модмо консоль ден виртуальный реальностьлан посна вер улыт.
Рӱдерлан оборудованийым налаш да вераҥдаш 105 млн теҥгем кучылтмо, тышеч кугурак ужашыже – федеральный бюджет гыч. Марий Элысе бюджет ты рӱдерым ышташ да воктенысе кумдыкым сылнештараш 27 млн теҥгем ойырен.
Марий Элым Вуйлатышын пресс-службыжын фотожо.