Ты историйым ялыште илыше ковам изиэм годымак каласкален. Тидын нерген кызытат чӱчкыдын шарналтем.
Ковам дек кок пӧрт коден илыше пошкудо ӱдырамаш кутырен шинчаш чӱчкыдын толын. Тудым мыят сайын шарнем, ала-молан чурийже эре ойган гай чучын мыланем. Ковамын палдарымыж почеш, ятыр ий ончыч тудын ӱдыржӧ черланен колен улмаш. Тойымеке, иктаж кок арня гыч колышо ӱдыржӧ омешыже кончаш тӱҥалын: аважым эре сӧрвален йодын. Но мом йодмыжым ӱдырамаш умылен кертын огыл. Ковамже иканаште тогдаен: 17 ияш ӱдырым, изираклан шотлен, марлан кайышашлык тувыр дене огыл, а тыглай вургемым чиктен тоеныт, садлан чонжо ласкалыкым муын огыл. Пошкудыжлан ковам малаш вочмыж деч ончыч молитвам лудаш темлен.
Эрлашыжым эрдене тудо ковам дек ӧрткен куржын толын. Омешыже адак ӱдыржӧ кончен да аваж деч теве мом шукташ йодын: кевытыште фатам налаш да толшаш рушарнян эрдене, корнышто вашлиялтше икымше машинам шогалтен, фатам пуаш. Ӱдырамаш фатам налын да палемдыме кечын эрденак корныш лектын. Икмыняр жап гыч тораште фургонан машинам ужын. Машинам шогалтен, кабиныште кок салтак шинчен. Нунылан ава ойгыж нерген каласкален, молан тыге ыштымыжым умылтараш тыршен. Тидлан салтак-влак вашештеныт: «Жапым паленак корныш лектында. Салтакым мӧҥгыжӧ тояш кондена – службо годым шкенжым шке пытарен. Фатам колоткаш воктекыже пыштена».
Ольга.
Йошкар-Ола.