Ты мероприятийыш Российын 55 регионжо, тыгак Узбекистан да Казахстан гыч 900 наре еҥ ушнен. Марий Эл гыч тушко 12 командылан шелалтше 42 тунемше миен да 8 призовой верым налын.
«ТехноСтрелка» – кызытсе технологий нерген шуко палыше, инноваций проект-шамычым ямдылыше, ум пален налаш тыршыше йоча-шамычлан фестиваль. Тений ты фестивальыш 5 хакатоным (тӱшка таҥасымашым) пуртымо: «ТехноГрад», «Цифровой вызов», «БиоГенезис» да «ТехноАРТ». Марий Эл гыч ӱдыр-рвезе-влак кумытыштыжо пашам ыштеныт да кажныштыже призовой вер дене палемдалтыныт.
Сеҥыше ден призёр-влакым талантан йоча-шамыч нерген кугыжаныш информационный ресурсыш пуртат. Тидыже нунылан «Талант и успех» фондын эртарыме научно-образовательный программе ден проектлаш ушнаш, тунемме процессыште школьниклан шке регионысо полышлан эҥерташ йӧным пуа да технический вузыш тунемаш пурымо годым шӱкалтышым ышта.